میوات/نوح، پریس ریلیز،ہماراسماج:تعلیمی پسماندگی کو دور کرنے اور طالبات کو اعلیٰ تعلیم کے مواقع فراہم کرنے کی سمت میں آروہی ماڈل سینئر سیکنڈری اسکول، ریواسن (نوح) نے ایک نئی تاریخ رقم کر دی ہے۔ اسکول کے پرنسپل ڈاکٹر محمد جنید کی خصوصی دلچسپی اور مخلصانہ رہنمائی میں اسکول کی چار طالبات عالیہ، رومانہ، الما اور رضوانہ نے پہلی بار ملک کی مایہ ناز درسگاہ علی گڑھ مسلم یونیورسٹی (AMU) کے گیارہویں جماعت کے داخلہ امتحان میں شرکت کی۔ یہ پہلا موقع ہے کہ آروہی اسکول کی طالبات نے اتنی بڑی مرکزی یونیورسٹی کا رخ کیا ہے، جسے علاقے میں لڑکیوں کی تعلیم اور ان کی ہمہ جہت ترقی کے حوالے سے ایک بڑی کامیابی قرار دیا جا رہا ہے۔پرنسپل ڈاکٹر محمد جنید نے نہ صرف ان طالبات کی حوصلہ افزائی کی بلکہ انہیں داخلہ امتحان کی تیاری، فارم کی کارروائی اور علی گڑھ کے تعلیمی ماحول سے روشناس کرانے میں کلیدی کردار ادا کیا۔ ان کی اس تعلیمی سرپرستی کی بدولت ان طالبات کے لیے قومی سطح کے اداروں کے راستے ہموار ہوئے ہیں۔ اپنی بیٹیوں کو علی گڑھ مسلم یونیورسٹی جیسے تاریخی تعلیمی ادارے تک پہنچانے پر والدین نے مسرت کا اظہار کرتے ہوئے پرنسپل صاحب کا تہہ دل سے شکریہ ادا کیا ہے۔ والدین کا کہنا ہے کہ ڈاکٹر محمد جنید صاحب کی کوششوں اور صحیح رہنمائی کی بدولت ان کی بچیاں پہلی بار علی گڑھ پہنچنے میں کامیاب ہوئیں، جو ان کے مستقبل کے لیے ایک سنگ میل ثابت ہوگا۔طالبات کے اس سفر سے اسکول کے دیگر طلبہ میں بھی اعلیٰ تعلیم کے تئیں نیا جوش پیدا ہوا ہے۔ مقامی لوگوں اور تعلیمی حلقوں نے ڈاکٹر محمد جنید کی اس کاوش کو بے حد سراہا ہے اور امید ظاہر کی ہے کہ اس طرح کی سرپرستی سے آروہی اسکول کے بچے مستقبل میں بھی قومی سطح کے مقابلوں میں اپنی صلاحیتوں کا لوہا منواتے رہیں گے۔
