لاہور، (یو این آئی) اولمپک گولڈ میڈلسٹ ارشد ندیم نے کہا ہے کہ آئندہ چند ماہ بڑے ایونٹس کے حوالے سے نہایت اہم ہیں اور وہ ان کے لیے بھرپور تیاری کر رہے ہیں۔پاکستانی میڈیا رپورٹ کے مطابق ارشد ندیم نے کہا کہ ان کا ہدف کامن ویلتھ گیمز میں اپنے اعزاز کا دفاع کرنا، ایشین گیمز میں شرکت اور ڈائمنڈ لیگز میں بہترین کارکردگی دکھانا ہے۔انہوں نے بتایا کہ وہ لاہور میں باقاعدہ ٹریننگ کر رہے ہیں اور اپنی فٹنس پر خاص توجہ دی ہے، جبکہ اس وقت وہ مکمل طور پر فٹ ہیں۔ارشد ندیم کے مطابق قطر میں شیڈول ڈائمنڈ لیگ مئی کے بجائے اب جون میں منعقد ہوگی، جس کے باعث انہیں ٹریننگ کے لیے مزید وقت مل گیا ہے۔انہوں نے کہا کہ جولائی میں کامن ویلتھ گیمز، اس کے بعد ڈائمنڈ لیگز، ورلڈ ایتھلیٹکس الٹیمیٹ چیمپئن شپ اور پھر ایشین گیمز میں شرکت کریں گے۔اپنے اہداف کے بارے میں انہوں نے کہا کہ وہ ہر ایونٹ میں بہترین کارکردگی دکھا کر ملک کا نام روشن کرنا چاہتے ہیں اور مداحوں سے دعاؤں کی درخواست بھی کی۔ارشد ندیم نے یہ بھی کہا کہ شدید گرمی کے باعث وہ ایک سے دو ماہ کے لیے جنوبی افریقہ میں ٹریننگ کرنے کا ارادہ رکھتے ہیں تاکہ تیاری کو مزید بہتر بنایا جا سکے۔دوسری جانب ان کے کوچ سلمان اقبال بٹ نے کہا کہ یہ سال ٹیم کے لیے انتہائی چیلنجنگ ہے کیونکہ تین بڑے ایونٹس کے ساتھ ساتھ ڈائمنڈ لیگز بھی شیڈول میں شامل ہیں۔انہوں نے مزید کہا کہ اس وقت ٹریننگ کا مرحلہ جاری ہے اور کھلاڑی کی ٹیکنیک اور اسٹرینتھ پہلے سے بہتر ہے، جس سے امید ہے کہ آئندہ مقابلوں میں شاندار نتائج سامنے آئیں گے۔
