اولان باتر (منگولیا)، (یو این آئی) ہندوستان کی پریتی پنوار اور دیپک نے پیر کے روز ایشیائی مکے بازی (باکسنگ) چیمپئن شپ 2026 میں اپنے اپنے ابتدائی راؤنڈ کے مقابلے جیت لیے ہیں۔خواتین کے 54 کلوگرام وزن کے زمرے میں، ورلڈ باکسنگ کپ فائنل کی گولڈ میڈلسٹ پریتی پنوار نے زبردست کارکردگی کا مظاہرہ کرتے ہوئے قازقستان کی سابق ایشیائی انڈر-22 چیمپئن الینا بازارووا کو 0-5 کے یکطرفہ فیصلے سے شکست دی۔مردوں کے 70 کلوگرام زمرے میں، ایشیائی یوتھ باکسنگ چیمپئن شپ کے کانسی کا تمغہ جیتنے والے دیپک نے اپنی حکمت عملی اور مضبوطی کا ثبوت دیتے ہوئے ازبکستان کے بیک اسد اللہ ئیو کو 2-3 کے منقسم فیصلے سے ہرا دیا۔دریں اثنا، اولمپک میڈلسٹ لولینا بورگوہین (75 کلوگرام) اور سابق ورلڈ چیمپئن نکہت زرین (51 کلوگرام) کو اپنے اپنے ابتدائی راؤنڈز میں ‘بائی (اگلے راؤنڈ میں براہِ راست داخلہ) مل گیا۔ جیسمین لمبوریا (57 کلوگرام)، انکوشیتا بورو (65 کلوگرام)، اروندھتی چودھری (70 کلوگرام) اور الفیہ پٹھان (80 پلس کلوگرام) کو بھی پہلے راؤنڈ میں ‘بائی ملا ہے۔دوسری جانب، ورلڈ چیمپئن میناکشی ہڈا (48 کلوگرام) منگل کو اپنے افتتاحی مقابلے میں جاپان کی یوکا ساداماتسو کا سامنا کریں گی، جبکہ اولمپین پوجا رانی (80 کلوگرام) قازقستان کی نادیزدا ریابیٹس سے ٹکرائیں گی۔مردوں کے ڈرا میں، انکش (80 کلوگرام) اور نریندر بیروال (90 پلس کلوگرام) کو ‘بائی ملا ہے، جبکہ جادومنی سنگھ 55 کلوگرام زمرے کے ایک سخت مقابلے میں جاپان کے ٹاپ سیڈ روئی یاماگوچی کا سامنا کریں گے۔ سچن سیواچ (60 کلوگرام) مقامی مکے باز بیان دلائی بایارکھو سے مقابلہ کریں گے، جبکہ آدتیہ پرتاپ یادو (65 کلوگرام) سعودی عرب کے مکے باز موسیٰ الحوساوی کا سامنا کرنے کے لیے تیار ہیں۔
