نئی دہلی، (یو این آئی) الیکشن کمیشن (ای سی آئی) نے جاری اسمبلی انتخابات کے دوسرے مرحلے میں تمل ناڈو اور مغربی بنگال میں بین الاقوامی مبصرین کو انتخابی عمل دکھانے کے لیے ایک پروگرام کا اہتمام کیا ہے، جس میں 17 ممالک کے 34 نمائندے شرکت کریں گے۔کمیشن نے پہلے مرحلے میں 9 اپریل کو ہونے والے انتخابات کے لیے بھی اسی طرح کا انٹرنیشنل الیکشن وزیٹر پروگرام منعقد کیا تھا۔ کمیشن کی جانب سے منگل کو جاری کردہ ایک ریلیز کے مطابق، چیف الیکشن کمشنر گیانیش کمار نے آج راجدھانی کے انڈیا انٹرنیشنل انسٹی ٹیوٹ آف ڈیموکریسی اینڈ الیکشن مینجمنٹ (3آئی ڈی ای ایم ) میں اس پروگرام کے دوسرے مرحلے کا افتتاح کیا۔دوسرے مرحلے میں شامل نمائندوں میں کچھ ممالک کے دہلی میں مقیم سفارتی مشنوں کے ارکان اور انٹرنیشنل آئیڈیاکا ایک نمائندہ شامل ہے۔ یہ شرکاء 22 اپریل سے 23 اپریل تک تمل ناڈو اور مغربی بنگال کا دورہ کریں گے۔ پروگرام کے پہلے مرحلے میں غیر ملکی نمائندوں نے 8 اور 9 اپریل کو آسام، کیرالہ اور پڈوچیری کا دورہ کیا تھا۔دورے سے قبل آج3آئی ڈی ای ایم میں نمائندوں کو ای وی ایم کا لائیو مظاہرہ کیا گیا۔ اس کے ساتھ ہی، پولنگ کے عمل کا براہ راست تجربہ حاصل کرنے کے لیے انہوں نے الیکٹرانک ووٹنگ مشینوں کا استعمال کرتے ہوئے ایک ماک پول (فرضی پولنگ) میں بھی حصہ لیا۔ نمائندوں نے ہندوستان کے انتخابی عمل میں اپنائی گئی تکنیکی اختراعات اور انتظامی حفاظتی اقدامات میں گہری دلچسپی ظاہر کی۔ انہوں نے ماہرین کے ساتھ ایک مکالماتی سیشن میں بھی شرکت کی، جہاں انہوں نے اپنے سوالات اور خدشات کا حل حاصل کیا۔یہ نمائندے بدھ کو مغربی بنگال اور تمل ناڈو کے لیے روانہ ہوں گے۔ وہ انتخابی سامان کی ترسیل اور تقسیم کے مراکز، نیز دیگر سہولیات بشمول ضلع کنٹرول روم اور میڈیا مانیٹرنگ سینٹرز کا دورہ کریں گے۔ مزید برآں، وہ 23 اپریل کی صبح اصل پولنگ کے عمل کا مشاہدہ بھی کریں گے۔دوسرے ممالک کے انتخابی اداروں کے نمائندوں کو ہندوستان کے انتخابی نظام سے براہ راست روشناس کرانا الیکشن کمیشن کا ایک اہم پروگرام ہے، جس کا مقصد دیگر ممالک کے انتخابی انتظامی اداروں اور بین الاقوامی تنظیموں کے ساتھ بین الاقوامی تعاون اور روابط کو فروغ دینا ہے۔
