رامپور،(یواین آئی) سماج وادی پارٹی کے سینئر رہنما محمد اعظم خان نے اپنے ڈریم پروجیکٹ مولانا محمد علی جوہرٹرسٹ کی صدارت سے استعفیٰ دے دیا ہے۔ یہ ٹرسٹ جوہر یونیورسٹی اور رامپور پبلک اسکول سمیت کئی تعلیمی ادارے چلاتا ہے۔ اعظم خان کی مسلسل قید کے باعث ٹرسٹ کے کام کاج میں رکاوٹ آ رہی تھی، جس کے پیش نظر یہ فیصلہ کیا گیا۔ اعظم خان کے ساتھ ان کی اہلیہ ڈاکٹر تزئین فاطمہ اور چھوٹے بیٹے عبداللہ اعظم نے بھی ٹرسٹ کے تمام عہدوں سے استعفیٰ دے دیا ہے۔ ٹرسٹ میں نئی ذمہ داریوں کے تحت اعظم خان کی بہن نکہت اخلاق کو چیئرپرسن مقرر کیا گیا ہے، جبکہ ان کے بڑے بیٹے محمد ادیب اعظم کو سکریٹری بنایا گیا ہے۔ سماج وادی پارٹی کے ایم ایل اے نصیر احمد خان کو جوائنٹ سکریٹری کی ذمہ داری دی گئی ہے، جبکہ مشتاق احمد صدیقی اور جاوید الرحمن خان کو بالترتیب نائب صدر اورخازن مقرر کیا گیا ہے۔ مولانا محمد علی جوہر یونیورسٹی کے رجسٹرار ڈاکٹر ایس این سلام نے بتایا کہ ٹرسٹ میں یہ تبدیلیاں اس کی ہموار کارکردگی کو یقینی بنانے کے لیے کی گئی ہیں۔ انہوں نے کہا کہ کئی ٹرسٹیوں کے جیل میں ہونے کے باعث کام متاثرہورہا تھا، جس کی وجہ سے یہ فیصلہ کیا گیا۔ رجسٹرار کے مطابق انتظامیہ ٹرسٹ کی جائیدادوں اور لیز پر بھی کارروائی کر رہی ہے۔ قابل ذکر ہے کہ مولانا محمد علی جوہر ٹرسٹ سماج وادی پارٹی کے دوراقتدارمیں اعظم خان کا ایک ڈریم پروجکٹ تھا، جس کے تحت انہوں نے رامپورمیں جوہر یونیورسٹی قائم کی۔
