ڈھاکہ، مئی (یواین آئی )بنگلہ دیش کے تیز گیند باز ناہید رانا نے اپریل 2026 کے لیے ‘آئی سی سی مینز پلیئر آف دی منتھ کا اعزاز اپنے نام کر لیا ہے۔ نیوزی لینڈ کے خلاف ون ڈے سیریز میں ان کی تباہ کن بالنگ نے انہیں اس باوقار ایوارڈ کا حقدار بنایا۔ناہید رانا یہ اعزاز حاصل کرنے والے بنگلہ دیش کے دوسرے کھلاڑی بن گئے ہیں۔ ان سے قبل گزشتہ سال اپریل (2025) میں اسٹار آل راؤنڈر مہدی حسن میراز نے یہ ایوارڈ جیتا تھا۔کیوی ٹیم کے خلاف تین میچوں کی ون ڈے سیریز میں ناہید رانا نے مجموعی طور پر 8 وکٹیں حاصل کیں۔دوسرے ون ڈے میں ناہید نے اپنے کیریئر کی دوسری پانچ وکٹیں (5/32) حاصل کیں اور نیوزی لینڈ کی بیٹنگ لائن کو تہس نہس کر دیا۔چٹوگرام میں کھیلے گئے آخری میچ میں انہوں نے 2 اہم وکٹیں لے کر بنگلہ دیش کو سیریز میں 2-1 سے فتح دلوانے میں کلیدی کردار ادا کیا۔پوری سیریز میں ان کی وکٹ لینے کی اوسط 16.75 اور اکانومی ریٹ 4.46 رہا، جس پر انہیں ‘پلیئر آف دی سیریز بھی قرار دیا گیا۔ایوارڈ جیتنے کے بعد ناہید رانا کا کہنا تھا”نیوزی لینڈ جیسی عالمی معیار کی ٹیم کے خلاف پرفارم کرنے کے بعد آئی سی سی پلیئر آف دی منتھ بننا ایک بہترین احساس ہے۔ اپنے ہوم گراؤنڈ پر ایسی کارکردگی دکھانا میرے لیے ہمیشہ یادگار رہے گا۔ میں اپنی ٹیم اور ساتھی کھلاڑیوں کا شکر گزار ہوں جنہوں نے مجھ پر بھروسہ کیا۔”رانا کی یہ فارم محض اتفاق نہیں ہے، اس سے قبل مارچ 2026 میں بھی انہوں نے پاکستان کے خلاف تین ون ڈے میچوں میں 8 وکٹیں حاصل کی تھیں۔ ان کی مسلسل بہتر ہوتی ہوئی کارکردگی نے انہیں عالمی کرکٹ کے ابھرتے ہوئے ستاروں میں شامل کر دیا ہے۔واضح رہے کہ ناہید رانا نے رواں ماہ پاکستان کے خلاف پہلے ٹیسٹ میچ کی دوسری اننگز میں تباہ کن بولنگ کرتے ہوئے بظاہر ڈرا ہوتے میچ کو بنگلہ دیش کی جیت میں تبدیل کردیا تھا۔
