ناظم بیگ
بلند شہر،سماج نیوز سروس:نئے سال کی آمد کے موقع پر ضلع پنچایت کے آڈیٹوریم میں ایک عظیم الشان مشاعرہ اور کوی سمیلن کا انعقاد کیا گیا۔ پروگرام کا اہتمام ڈاکٹر نظامی شیدا راہی اور کو آرگنائزر مقصود جالب نے کیا۔ تقریب کی صدارت علی گڑھ سے تشریف لائے ڈاکٹر جاوید اختر خان نے کی اور دہلی سے تشریف لائے سید علی عباس نوگانوی نے اپنے مخصوص انداز میں پروگرام کی نظامت کی۔ مہمانِ خصوصی ایڈیشنل چیف آفیسر ضلع پنچایت دھرم جیت ترپاٹھی اور مہمانانِ زی وقار میں اشونی بنسل، ایکسائز آفیسرراجندر کمار، آئی جی اسٹا مپ ایس کے راوت، ایڈوکیٹ دھرمیندر سنگھ، بی ڈی شرما اور انیمیش شرما آتش وغیرہ نے فیتہ کاٹ کر مشاعرہ کا افتتاح کیا۔ بعد ہ دیوی سرسوتی کی تصویر کے سامنے چراغ روشن کیا گیا۔ ڈاکٹر جاوید اختر خان نے شمع روشن کر کے مشاعرہ کا با قاعدہ آغاز کیا۔ کنوینر ڈاکٹر نظامی راہی اور کو کنوینر مقصود جالب نے تمام مہمانوں، شاعروں اور ادیبوں کو پھولوں مالائیںپہنا کر استقبال کیا ۔ نئے سال کے پہلے دن حاضرین نے ادبی تجربے سے خوب لطف اٹھایا اور ہال تالیوں سے گونج اٹھا۔ شعراء کے پسندیدہ اشعار قارئین کی خدمت میں پیش ہیں۔
تیری مشتاق نگاہوں کی ادا کیا کہیے
شعر پڑھتا بھی نہیں داد چلی آتی ہے
اینمیش شرما آتش
عمر بھر ہوتا رہا ہم سے یہی جرم عظیم
حسن والے نظر انداز نہ ہونے پائے
انور غازی آبادی
نہ تو غالب ہوں میں نہ کوئی میر ہوں
دورِ حاضر کی ادنیٰ سی تحریر ہوں
اشوک
ان کے علاوہ راجیش راز ، ارشاد احمد شرر، پونم شرما، ڈاکٹر راہی نظامی شیدا، شری کرشن شرما اور گورو تیواری، اشفاق دانش،مہربان تاجر، راجیو کامل وغیرہ نے بھی اپنے کلام سے نوازا۔آخر میں کنوینر ڈاکٹر نظامی راہی نے شعراء او رحاضرین کا شکریہ ادا کیا۔
