محمد زاہد امینی
نوح،میوات،سماج نیوز سروس: بی جے پی اقلیتی مورچہ کے قومی نائب صدر و سابق ایم ایل اے چوہدری ذاکر حسین آج ضلع پلول سے تعلق رکھنے والے دنیش شرما کے گھر پہنچے جو گزشتہ روز ملک حفاظت کرتے ہوئے پاکستانی افواج کی گولی باری کا سامنا کرتے ہوئے شہید ہو گئے تھے۔ذاکر حسین نے گاؤں گلاواد میں خاندان کے ساتھ اظہار ہمدردی کی بلکہ ان کی شہادت کو سلام پیش کرتے ہوئے انہیں خراج عقیدت بھی پیش کیا۔بی جے پی لیڈر نے کہا کہ وہ ان کے والدین کو سلام پیش کرتے ہیں جنہوں نے ایسے بہادر شہید کو جنم دیا۔ان کی بہادری اور شہادت پر پورا ملک ان کا مقروض رہے گا۔انہوں نے کہا کہ وزیر اعظم نریندر مودی کی مضبوط قیادت میں حکومت ہند نے پاکستان کی طرف سے دکھائے گئے جرات کا بدلہ لینے کے لیے ٹھوس اقدامات کیے ہیں، جس پر آج ملک کے 140 کروڑ عوام ان کے ساتھ متحد ہیں۔ہمارے ملک کی فوج پاکستان کی طرف سے کی جانے والی بزدلانہ حرکت اور بزدلی کا بدلہ لینے کے لیے مسلسل پرعزم ہے۔وہ اس جنگ میں شہید ہونے والے ملک کے تمام بہادر سپاہیوں کو بھی خراج عقیدت پیش کرتے ہیں۔
