جوہانسبرگ، 22 اگست (یو این آئی) وزیر اعظم نریندر مودی نے برکس ممالک کے درمیان باہمی اعتماد اور شفافیت کے ساتھ لچکدار اور جامع سپلائی چین بنانے کی اہمیت پر زور دیا اور برکس ممالک سے ہندوستان کی ترقی کے سفر میں شراکت دار بننے پر زور دیا۔مسٹر مودی سے یہاں برکس بزنس فورم کی بحث کے بعد ان سے اس سلسلے میں دریافت کیا گیا تو وزیر اعظم نے سماجی اور اقتصادی چیلنجوں سے نمٹنے کے لیے ٹیکنالوجی پر مبنی حل سمیت کاروبار کرنے میں آسانی کو بہتر بنانے کے لیے ہندوستان کی طرف سے کی جانے والی مختلف اصلاحات پر روشنی ڈالی۔وزیر اعظم نے کہا کہ کووڈ نے لچکدار اور جامع سپلائی چین کی اہمیت کو اجاگر کیا ہے اور اس کے لیے باہمی اعتماد اور شفافیت کی اہمیت پر زور دیا۔ انہوں نے اس بات پر بھی زور دیا کہ برکس مل کر عالمی بہبود، خاص طور پر گلوبل ساؤتھ میں اہم کردار ادا کر سکتے ہیں۔انہوں نے کہاکہ کووڈ وبائی مرض نے ہمیں پائیدار اور جامع سپلائی چین کی اہمیت سکھائی ہے ۔
اس کے لیے باہمی اعتماد اور شفافیت بہت ضروری ہے ۔ ہم ایک دوسرے کی طاقتوں کو یکجا کر کے پوری دنیا خصوصاً گلوبل ساؤتھ کی فلاح و بہبود میں اہم کردار ادا کر سکتے ہیں۔وزیر اعظم مودی نے ہندوستان میں پچھلے نو سالوں میں کئے گئے اقدامات کے بارے میں تفصیلی جانکاری دی اور کہا کہ ان تمام کوششوں کا عام لوگوں کی زندگیوں پر براہ راست مثبت اثر پڑا ہے ۔ گزشتہ نو سالوں میں عوام کی آمدنی میں تقریباً تین گنا اضافہ ہوا ہے ۔ ہندوستان کی اقتصادی ترقی میں خواتین کی بھرپور شرکت رہی ہے ۔ آئی ٹی سے لے کر خلا تک، بینکنگ سے لے کر صحت تک، خواتین مردوں کے ساتھ کندھے سے کندھا ملا کر کام کر رہی ہیں اور ملک کی ترقی میں اپنا حصہ ڈال رہی ہیں۔وزیر اعظم نے برکس کے کاروباری رہنماؤں کو ہندوستان کے ترقیاتی سفر میں شرکت کی دعوت دی۔ انہوں نے کہاکہ "ہندوستان کے لوگوں نے 2047 تک ایک ترقی یافتہ ملک بننے کا عہد کیا ہے ۔ میں آپ سب کو ہندوستان کی ترقی کے سفر میں شامل ہونے کی دعوت دیتا ہوں۔
