کار کی ٹکر سے نوجوان کی موت

دیوبند (سماج نیوز سروس) ناگل تھانہ علاقہ کے کھٹولی گاؤں میں واقع شاہراہ پر نامعلوم کار کی ٹکر سے شاہراہ کے کنارے کھڑے دیوبند کے باشندہ نوجوان دانش ملک کی موقع پر ہی موت ہو گئی، جب کہ پاس کھڑے دو نوجوان بال بال بچ گئے۔ واقعے کے بعد کار ڈرائیور موقع سے فرار ہوگیا۔ اطلاع ملنے پر پولیس موقع پر پہنچی اور لاش کو تحویل میں لے کر ناگل کے سرکاری اسپتال پہنچایا۔معلومات کے مطابق گزشتہ شام دانش ملک (20) ولد حافظ عرفان ملک ساکن محلہ شاہ بخاری (موری تیلیان) دیوبند اپنے چچا زاد بھائی سلمان (23) ولد اقبال اور توحید (22) ولد ڈاکٹر اکرم سبھاش چوک دیوبند کے ساتھ موٹر سائیکل سے سہارنپور سے دیوبند واپس آ رہے تھے۔ اس دوران تینوں نوجوان کھٹولی میںواقع ہائی وے پر انٹر کالج کے سامنے کسی کام کے لیے رُک کر ہائیوے کے کنارے کھڑے ہو گئے۔ اسی دورران پیچھے سے آئی تیز رفتار کار نے دانش کو ٹکر مار دی جس سے وہ موقع پر ہی جاں بحق ہو گیا، کار ڈرائیور کار سمیت موقع سے فرار ہو گیا۔حادثہ دیکھ کر اس کے دوستوں نے اپنے گھر والوں اور پولیس کو اطلاع دی۔ اطلاع ملتے ہی پولیس اور متوفی کے لواحقین و دیگر افراد بھی موقع پر پہنچ گئے۔ پولیس نے لاش کا پنچنامہ بھر کر ناگل سی ایچ سی بھیجا۔ واقعہ کی اطلاع ملتے ہی بڑی تعداد متعلقین ناگل اسپتال پہنچے اور حادثے پر گہرے رنج و غم کا اظہار کرتے ہوئے متاثرہ کے اہل خانہ کے تئیںہمدردی ظاہرکی۔بتایا گیا ہے کہ لواحقین نے نوجوان کا پوسٹ مارٹم کرانے سے انکار کر دیا جس کے بعد پولیس نے ضروری کارروائی کے بعد لاش اہل خانہ کے حوالے کر دی۔ پولیس کے مطابق نامعلوم گاڑی کی تلاش کی جاری ہے۔ دیر رات نوجوان کی لاش گھر پہنچتے ہی اہل خانہ میں کہرام مچ گیا ۔ آج بعد نماز ظہراحاطہ مولسری میں نوجوان کی نمازجنازہ ادا کی گئی،بعد ازیں غمگین ماحول میں سپرد خاک کردیاگیا۔