محمد زاہد امینی
نوح،میوات،سماج نیوز سروس: حکومت ہند کے گزٹ مردم شُماری 2026 کا عمل دو مرحلوں میں اور مختلف انداز سے عنقریب ہی شروع ہونے جارہا ہے اس لیے ملک کا ہر شہری بالخصوص مسلمان اس عمل میں بڑھ چڑھ کر حصہ لیں نیز اپنے اصل اور ضروری دستاویزات کو مکمل کرنے کے عمل کو اپنی ترجیحات میں شامل کریں۔مذکورہ خیالات کا اظہار ممتاز عالم دین حضرت مولانا حکیم الدین اشرف اٹاؤڑی صدر جمعیتہ علماء متحدہ پنجاب نے کیا وہ آج یہاں مردم شُماری 2026 کے تعلق سے اخباری نمائندوں سے بات چیت کر رہے تھے، انہوں نے مردم شُماری کی اہمیت بیان کرتے ہوئے کہا کہ اس مرتبہ مردم شُماری 2011 سے بالکل مختلف ہوگی اور حکومت ہند کے احکامات کے مطابق اس مرتبہ مردم شُماری کئی مراحل میں ہوگی۔انہوں نے ریاستہائے متحدہ پنجاب کے عوام خصوصاً مسلمانوں کو متنبہ کرتے ہوئے کہا کہ اس مرتبہ مسلمان خواب غفلت میں نہ رہیں کیونکہ یکم اپریل سے مردم شُماری کے پہلے مرحلے کا باقاعدہ آغاز کیا جا چکا ہے انہوں نے کہا کہ مردم شُماری کے سلسلے میں جمعیت علماہند کی مرکزی قیادت اور صدر محترم کی جانب سے بھی تمام صوبہ جات کے ذمہ داران وکارکنان جمعیت کو رہنما ہدایات جاری کر دی گئی ہیں کہ کارکنان جمعیت اس سلسلے میں اپنے اپنے علاقوں میں بیداری مہم چلائیں اور مردم شُماری کے تعلق سے لوگوں کی صحیح رہنمائی کریں،ان کے مطابق قومی صدر حضرت مولانا سید ارشد مدنی مدظلہ العالی نے جمعیت کی تمام اکائیوں کے موجودہ ذمہ داران و رضاکاروں سے اپیل کی ہے کہ جس طرح انہوں نے SIR میں لوگوں کی صحیح رہنمائی کی تھی اور فارم وغیرہ پر کرنے میں سرکاری اہلکاروں کا تعاون کیا تھا اسی طرح مردم شُماری میں بھی بڑھ چڑھ کر حصہ لیں۔مولانا حکیم الدین اشرف اٹاؤڑی نے مزید معلومات فراہم کرتے ہوئے کہا کہ پہلا مرحلہ (ایس آئی آر) جس میں شمار کنندگان کے ذریعہ رہائشی معلومات، سہولیات اور اثاثوں وغیرہ سمیت بنیادی ڈھانچے کے بارے میں معلومات جمع کی جاتی ہیں اس کا صوبہ ہریانہ میں یکم اپریل سے آغاز کیا جا چکا ہے جبکہ کچھ ریاستوں میں پہلا مرحلہ یعنی SIR کو پہلے ہی مکمل کیا جاچکا ہے۔دوسرے مرحلے میں آبادی کے ڈیٹا پر توجہ مرکوز ہوتی ہے جس میں انفرادی خصوصیات،عمر،جنس،مذہب، تعلیم و پیشہ وغیرہ کے بارے میں معلومات جمع کی جاتی ہیں اس مرحلے کا آغاز آئندہ سال یعنی 2027 کے اوائل میں با قاعدہ ہوجائے گا۔مولانا حکیم الدین اشرف اٹاؤڑی نے آخر میں یقین دہانی کراتے ہوئے کہا کہ اس سلسلے میں جلد ہی ریاستی وضلعی جمعیتوں کی ہنگامی میٹنگیں منعقد کی جائیں گی تاکہ لوگوں کو حالات سے باخبر کیا جاسکے۔
