نئی دہلی ،4اپریل ،سماج نیوزسروس:رمضان المبارک کے پہلے عشرہ کے مکمل ہونے کے ساتھ تراویح میں قرآن پاک ختم ہونے کا بھی سلسلہ شروع ہوگیا ہے، گزشتہ روز رمضان المبارک کی بارہویں شب میں پٹودی ہاؤس میں محمد فیصل کے مکان پر حافظ محمد انس نے نماز تروایح میں قرآن کریم مکمل کیا۔ جب کہ سامع کا فریضہ حافظ زید نے ادا کیا۔ ختم کلام اللہ کی مناسبت سے ایک دعائیہ مجلس منعقد ہوئی ، اس مجلس سے خطاب کرتے ہوئے داعی والے مسجد کے امام نے قرآن کریم مکمل کرنے والے حافظ کو اور تراویح میں شریک ہونے والے لوگوں کو مبارک باد پیش کرتے ہوئے قرآن کریم کی عظمت پر روشنی ڈالی ۔ انہوں نے دونوں حفاظ کرام کو مبارک باد دی اور کہا کہ اللہ تعالیٰ کا بڑا فضل وکرم اور عنایات ہیں کہ چھوٹے چھوٹے بچے بھی قرآن پاک کو اپنے سینوں میں محفوظ کرلیتے ہیں۔ مولانانے کہا کہ قرآن پاک ہمیں نیکیوں اور بھلائیوں کا راستہ دکھاتا ہے اور دنیا سے گمراہی کو ختم کرتا ہے، اس لئے ہم سب اور بچوں کو بھی قرآنی ہدایات پرعمل کرنا چاہئے۔ انہوں نے کہا کہ وہ والدین نہایت خوش نصیب ہیں جن کے بچے قرآن پاک حفظ کرتے ہیں ۔ مولانا نے کہا کہ قرآن کریم پڑھنا اور سننا باعث ثواب ہے اس لئے رمضان کے مہینہ میں قرآن کریم کی زیادہ سے زیادہ تلاوت کرنی چاہئے اور اپنی زندگیوں کو اس کے مطابق ڈھال لینا چاہئے۔ اس موقع پر مولانا محمد عامر مفتاحی نے ملک میں امن وامان اور خوش گوار ماحول بنے رہنے اور تمام حفاظ کو مسلسل قرآن کریم کی تلاوت کرنے ، ہر سال نماز تراویح میں سنانے نیز قرآنی ہدایات پر عمل پیرا رہنے کی دعا کرائی ۔ اس دعائیہ مجلس میں مولاناثاقب ،فراز،محمد شعیب،عبدالحسیب وغیرہ موجود رہے۔
