بنگلورو، ( یو این آئی)کرناٹک حکومت نے ایم چناسوامی اسٹیڈیم کو شائقین کے لیے محفوظ اور سہولیات سے آراستہ بنانے کے حوالے سے ‘کرناٹک اسٹیٹ کرکٹ ایسوسی ایشن کے اقدامات پر اطمینان کا اظہار کر دیا ہے۔ جمعرات کے روز ریاستی کابینہ نے اسٹیڈیم میں بین الاقوامی کرکٹ مقابلوں اور آئی پی ایل میچوں کے انعقاد کی باضابطہ منظوری دے دی ہے۔یہ اہم فیصلہ کے ایس سی اے کے صدر وینکٹیش پرساد اور رائل چیلنجرز بنگلور کے حکام بشمول سی ای او راجیش مینن کے ساتھ تفصیلی مشاورت کے بعد لیا گیا۔وینکٹیش پرساد نے میڈیا سے گفتگو کرتے ہوئے بتایا کہ انفراسٹرکچر سے متعلق زیادہ تر کام اپنے آخری مراحل میں ہیں اور امید ہے کہ فروری کے آخر تک میدان مکمل طور پر تیار ہو جائے گا۔ انہوں نے مزید کہا”بی سی سی آئی کی خواہش ہے کہ ہم چناسوامی اسٹیڈیم میں آئی پی ایل کے افتتاحی میچ کی میزبانی کریں۔ میں کرکٹ کی واپسی کے لیے تعاون کرنے پر ریاستی حکومت اور وزارتِ داخلہ کا مشکور ہوں۔”یہ پیش رفت ایک ایسے وقت میں سامنے آئی ہے جب رائل چیلنجرز بنگلور متبادل کے طور پر نوی ممبئی کے ڈی وائی پاٹل اسٹیڈیم اور رائے پور کے میدانوں پر غور کر رہی تھی۔ آئی پی ایل 2026 کا آغاز 26 مارچ سے ہونا ہے، لیکن چناسوامی اسٹیڈیم کی صورتحال واضح نہ ہونے کی وجہ سے بی سی سی آئی نے اب تک شیڈول جاری نہیں کیا تھا۔
