مرادآباد،سماج نیوز سروس:جامعہ قاسمیہ مدرسہ شاہی دارالطلبہ لالباغ کے وسیع صحن میںاجلاس دستاربندی کا انعقاد کیا گیا، جس کی صدارت جامعہ کے مہتمم مولانا سید اشہد رشیدی نے کی، جبکہ نظامت کے فرائض مفتی محمد توحید قاسمی استاذ جامعہ قاسمیہ مدرسہ شاہی نے انجام دئے، جلسہ کا آغاز مولانا قاری محمد حماد کی تلاوت اور قاری محمد اعظم کی نعت پاک سے ہوا۔ جامعہ کے استاذ حدیث مولانا خورشید انور قاسمی نے طلبہ کو نصیحت کرتے ہوئے کہا کہ آپ سب قابل مبارکباد تبھی ہیں جب آپ کی زندگی شریعت کے مطابق ہو، نفاق اور دیگر گناہوں سے بچیں، عمل میں ریاکاری اور دکھاوے سے بچیں، اپنی زبان کو کذب اور جھوٹ سے بچائیں، بدنگاہی سے بچیں اور اسلامی سوچ وفکر پر عمل کریں۔ علم حاصل کرنا بڑی ذمہ داری کا کام ہے، علم کے ساتھ عمل ضروری ہے، خلوت میں ہو یا جلوت میں ، ایسا نہ ہو کہ لوگوں کے سامنے تو عالم نظر آؤ اور تنہائی میں دنیا دار بن جاؤ۔جامعہ کے صدر المدرسین مولانا محمد اسعد دیوریاوی قاسمی نے کہاکہ کوشش کرنے والوں کو اﷲ ضرور نوازتا ہے، گناہوں سے بچنے اور تقویٰ کی حصول ، قناعت اختیار کرنے کی کوشش کرو،کیونکہ اصل غناء تو دل کا غنا ہے۔ علماء اور حفاظ کو چاہئے کہ قرآن کریم کی تلاوت کثرت سے کیا کریں کیونکہ تلاوت سے اﷲ کی محبت پیدا ہوگی، زندگی میں نور پیدا ہوگا ، اسی طرح نماز کی پابندی کریں، اس سے لوگوں کو عملی دعوت ملے گی۔جامعہ کے نائب مہتمم مولانا عبدالناصر نے طلبہ کو مخاطب کرتے ہوئے کہا کہ ایک امتحان کے بعد دوسرے امتحان کا آغاز ہے، عوام دیکھتے ہیں کہ جو قرآن وحدیث اور فقہ آپ نے مدرسہ میں پڑھا ہے اس کے مطابق آپ کی زندگی کتنی آراستہ ہے۔آپ خواص میں سے ہیں تو خواص والی پہچان اپنی عملی زندگی میں پیدا کریں، مثلاً: پنج وقتہ نماز کے ساتھ تہجد، اشراق، اوابین کا اہتمام کریں،کسی اﷲ والے سے اصلاحی تعلق قائم کریں،فرقہ باطلہ کا ہر ممکن تعاقب کریں اور ان کی سرکوبی کے لئے ہمہ تن تیار رہیں۔جامعہ کے مہتمم مولانا سید اشہد رشیدی نے طلبہ کو نصیحت کرتے ہوئے کہا کہ اﷲ تعالیٰ سب کو آزماتا ہے، کبھی دے کر کبھی لے کر، اﷲ تعالیٰ آپ کو علم دے کر آزمانا چاہتا ہے کہ آپ اس میں کیسے کامیاب ہوںگے؟ اﷲ کے دین کی حفاظت کرو، اﷲ تمہاری جان ومال کی حفاظت کرے گا۔ اور دین کی حفاظت علم پر عمل کرنے، اس کی نشر واشاعت کرنے، فرقہ باطلہ اورمخالف تحریکات کا مقابلہ کرنے سے ہوگا۔ جو مانگو اﷲ سے مانگو، اﷲ کے علاوہ کسی کے سامنے ہاتھ نہ پھیلاؤجہیز کی مخالفت کرو، ہرگز جہیز کا مطالبہ نہ کرو، مددکی ضرورت ہو تو اﷲ سے مانگو، فکر قاسمی کے محافظ بنو ، کبھی اختلاف کو ذاتی مخالفت کا رنگ مت دو۔ اور یہ بات ہمیشہ رکھو کہ جب تک اﷲ نہ چائے کوئی بھی نفع ونقصان نہیں پہنچتا سکتا ہے۔جامعہ کے صدر مفتی ومحدث مولانا مفتی شبیر احمد قاسمی نے بخاری شریف کا آخری درس دیتے ہوئے اولاً درود شریف پڑھنے کی فضیلت میں حدیث شریف بیان کی، جو ایک بار درود شریف پڑھتا ہے اﷲ اس پر دس رحمتیں ناز فرماتا ہے، جو ۱۰؍ بار درود شریف پڑھتا ہے اس پر سو رحمتیں نازل کرتا ہے، جو سو بار پڑھے گا اس کو اﷲ تعالیٰ تین نعمتوں سے سرفراز فرماتا ہے،نفاق سے برأت ، جہنم سے برأت، قیامت میں شہیدوں کے ساتھ اٹھائیںگے۔ مزید طلبہ کو نصیحت کرتے ہوئے کہا کہ اپنے اندر اخلاص وللہیت پیدا کرو، امت کے ذمہ داروں کی مخالفت نہ کرو، اور اسوۂ حسنہ کو اپناؤ۔
