تمام اسمبلی حلقوں میں پارٹی کے سینئر لیڈروں کو میدان میں اتارا، طارق انورنے ڈاکٹر نریش کمار کے اسمبلی حلقہ منڈکامیںحکمراں پارٹیوں کو للکارا
عامر سلیم خان
نئی دہلی، سماج نیوز سروس: کانگریس نے اتوار کو دہلی میں ہونیوالے میونسپل کارپوریشن انتخابات میں اپنی پوری طاقت جھونک دیہے اور لوگوں سے کانگریس کو کامیاب بنانے کی اپیل کی ہے۔آج دہلی کے مختلف اسمبلی حلقوں میں پارٹی کے سینئر لیڈروں کو بھیج کر انتخابی مہم چلارہی ہے۔اسی سلسلے میں آج کانگریس جنرل سکریٹری طارق انور، دہلی پردیش کانگریس کمیٹی کے سینئر ترجمان ڈاکٹر نریش کمار نے آج منڈکا ودھان سبھا حلقہ کے وارڈ 32 کنجھاؤلا، وارڈ 33 رانی کھیڑا کے کارپوریشن امیدوار جوگیندر سنگھ اور نرملا وتس کی حمایت میں جلسوں سے خطاب کیا۔دہلی کارپوریشن کیلئے ہورہے انتخاب میں سہ رخی مقابلہ مانا جارہا ہے۔ کانگریس، عام آدمی پارٹی اور بھارتیہ جنتا پارٹی تینوں پارٹیوں نے کارپوریشن الیکشن میں پوری طاقت لگائی ہوئی ہے۔ 4 دسمبر 2022 کوراجدھانی دہلی میں کارپوریشن الیکشن کیلئے ووٹ ڈالے جائینگے۔ ہر پارٹی کارپوریشن میں اپنی اپنی کامیابی کے دعوے کررہی ہے۔
منڈکا اسمبلی حلقہ میں آج کانگریس انتخابی مہم سے کانگریس جنرل سکریٹری طارق انور نے کہا کہ پوروانچل کے زیادہ تر لوگ منڈکا علاقوں کی غیر منظور شدہ کالونیوں میں رہتے ہیں، لیکن یہاں بنیادی سہولیات کی کمی کی وجہ سے لوگ جہنم کی زندگی گزارنے پر مجبور ہیں۔ بنیادی سہولیات جیسے کہ پانی جمع ہونا، نالوں کی صفائی کا فقدان، سیوریج کا فقدان یہاں عام بات ہے۔ بھارتیہ جنتا پارٹی کی سرکار نے کارپوریشن میں حکومت بنانے کیلئے بلند بانگ دعوے کئے تھے لیکن سچائی یہ ہے کہ پوری دہلی گندگی کاانبار بن گئی ہے ۔ ہر علاقہ میں سڑکیں اور گلیاں ٹوٹی ہوئی ہیں اور یہی حال منڈکا کی مختلف کالونیوں میں سڑکوں کا ہے جو چاروں طرف سے ٹوٹی پھوٹی ہیں۔ نہ علاقہ میں کوئی اسکول قائم ہوا اور نہ اسپتال، پینے کے صاف پانی کی کمی کی وجہ سے لوگ بیمار ہو رہے ہیں، لیکن بی جے پی اور کجریوا حکومت کو عوام کی کبھی فکر نہیں رہی۔ اس سے بہتر بہار، اتر پردیش اور جھارکھنڈ کے دیہی علاقے ہیں جہاں کم از کم یہ بنیادی سہولیات میسر ہیں۔
مسٹرطارق انور نے کہا کہ یہ لوگ دہلی میں اپنے بچوں کیلئے بہتر تعلیم اورروزگار کی تلاش میں دہلی آئے تھے لیکن جہنم کی زندگی گزارنے پر مجبور ہیں۔ مرکز کی بی جے پی حکومت کو دہلی کی فکر نہیں ہے اور دہلی کے وزیر اعلی اروند کجریوال کے پاس گجرات میں انتخابی مہم چلانے کی وجہ سے دہلی کیلئے فرصت ہی نہیں ہے۔مسٹر طارق انورنے کہا کہ دہلی کی ترقی کانگریس کی شیلا دکشت حکومت نے 15 سال میں کی تھی۔ انہوں نے عوام سے اپیل کی کہ وہ 4 دسمبر کو کانگریس امیدواروں کو کامیاب بنائیں۔ڈاکٹر نریش کمار نے بھی الزام لگایا کہ دہلی سرکار اور بھارتیہ جنتا پارٹی کی کارپوریشن سرکار نے دہلی کے عوام کو دھوکہ دیا ہے۔ جس علاقہ میں بھی چلے جائیں عوام بنیادی سہولیات سے محروم ہیں۔دہلی سرکار نے عوام سے بہت سارے بلند بانگ دعوے کئے تھے لیکن سارے دھرے کے دھرے رہ گئے۔ ایسے میں ایک بار دہلی والوں کو کانگریس کی سرکار لانی چاہئے جس نے دہلی میں چار چاند لگادیئے تھے عالمی معیار کاشہر بنادیا تھا۔