بلند شہر ،سماج نیوزسروس :تخصیل سیانہ کے تھانہ خانپورعلاقے کے گائوں کھدر پور میں ایک سگائی کی تقر یب میں آلود ہ پنیر کی سبزی کھانے سے لوگوں کے بیمار ہونے کی اطلاع کے بعد ڈسٹرکٹ مجسٹریٹ کی ہدایت پر فوڈ سیفٹی اینڈ ڈرگ ایڈمنسٹریشن ڈپا رٹمنٹ کی ٹیم تشکیل دی گئی۔ اس ٹیم میں فوڈ سیفٹی آفیسر مسٹر رام ملن رانا، فوڈ سیفٹی آفیسر مسٹر انل کمار کوشل، فوڈ سیفٹی آفیسر مسٹر مہیش کمار اور فوڈ سیفٹی آفیسر مسٹر سنجیت کمار شامل تھے۔ ٹیم نے ابتدائی طور پر سگائی کی تقریب کی جگہ کا دورہ کرکے وہا ں ہر طر ح سے انکوائری کی گئی۔ بتایا گیا ہے کہ تقریب میں پنیر کی سبزی کھانے کے بعد کچھ لوگ بیمار ہو گئے تھے اور یہ پنیر پرتا پور گلائو ٹھی علاقے میں ایک دکاندارکے یہا ں سے خریداگیا تھا۔ ٹیم نے اکبر پور میں واقع ہریانہ ڈیری ؍کنفکشنری کی دکان پر چھاپہ مارا۔ ڈیری کے مالک ستیہ پرکاش جو اصل میں علی گڑھ کا رہنے والا ہے، جائے وقوعہ پر موجود تھا ۔ اس نے تقریب میں پنیر فروخت کرنے کااعتراف کیا ۔ جائے وقوعہ سے تقریبا 15 کلو پنیر بھی ملا ہے۔ فوڈ سیفٹی کی ٹیم نے پنیر کا ایک نمونہ لے کر اسے جانچ کے لیے اسٹیٹ فوڈ لیبارٹری کو بھیج دیا ہے۔ لیبارٹری سے ٹیسٹ رپورٹ آنے کے بعد مذکورہ بالا کے خلاف مقدمہ درج کیا جائے گا۔معاملے کی حساسیت کے پیش نظر مذکورہ ڈیری کا فوڈ رجسٹریشن اگلے احکامات تک معطل کر کے ڈیری کو بند کر دیا گیا ہے۔
