دبئی، (یو این آئی) نیوزی لینڈ کے اسٹار بلے باز ڈیرل مچل نے جنوری 2026 کے لیے آئی سی سی مینز پلیئر آف دی منتھ کا اعزاز حاصل کر لیا ہے۔ انہوں نے مسلسل دو شاندار سنچریاں اسکور کر کے نیوزی لینڈ کو ہندوستان کے خلاف ون ڈے سیریز میں فتح دلانے میں کلیدی کردار ادا کیا تھا۔نیوزی لینڈ کے مچل نے ہندوستان کے ٹی ٹوئنٹی کپتان سوریا کمار یادو اور انگلینڈ کے مایہ ناز بلے باز جو روٹ کو پیچھے چھوڑ کر یہ ایوارڈ اپنے نام کیا۔ جنوری میں ہندوستان میں کھیلی گئی تین میچوں کی ون ڈے سیریز میں، نیوزی لینڈ نے 0-1 سے پیچھے رہنے کے بعد 2-1 سے کامیابی حاصل کی تھی۔ مچل نے دوسرے میچ میں ناٹ آوٹ 131 رن بنا کر اپنی ٹیم کی واپسی یقینی بنائی اور تیسرے میچ میں 137 رن کی اننگز کھیل کر اپنی ٹیم کو 337/8 کے فاتحانہ اسکور تک پہنچایا۔انہوں نے 176 کی اوسط سے مجموعی طور پر 352 رن بنائے اور پلیئر آف دی سیریز کا ایوارڈ بھی جیتا۔ اپنی اسی شاندار کارکردگی کی بدولت مچل نے آئی سی سی ون ڈے بیٹنگ رینکنگ میں بھی پہلی پوزیشن حاصل کر لی ہے۔ اس کے بعد پانچ میچوں کی ٹی ٹوئنٹی سیریز میں بھی انہوں نے 186.56 کے اسٹرائیک ریٹ سے 125 رن بنا کر اپنی فارم سے متاثر کیا۔
