امپھال، ایجنسیاں: کھیم چند سنگھ شمال مشرقی ریاست منی پور کے نئے وزیر اعلیٰ ہوں گے۔ منگل کو منی پور میں بی جے پی قانون ساز پارٹی کی میٹنگ میں یمنم کھیم چند سنگھ کو لیڈر منتخب کیا گیا۔ سابق وزیر اعلیٰ این بیریندر سنگھ بھی موجود تھے۔ انتخاب بی جے پی کے انچارجوں کی موجودگی میں ہوا۔ قابل ذکر ہے کہ شمال مشرقی ریاست منی پور میں میتی-کوکی نسلی تنازعہ کے بعد اس وقت کے وزیر اعلیٰ این بیرن سنگھ کو استعفیٰ دینے پر مجبور کردیا گیا تھا۔ بعد ازاں 13 فروری 2025 کو صدر راج نافذ کر دیا گیا۔ اب تقریباً ایک سال بعد ریاست میں نئے وزیر اعلیٰ کی تقرری کا راستہ صاف ہو گیا ہے۔ یمنم کھیم چند سنگھ کا تعلق میتی برادری سے ہے۔ منی پور کے اس وقت کے وزیر اعلیٰ این بیرن سنگھ نے 9 فروری 2025 کو استعفیٰ دے دیا تھا۔ تب سے بی جے پی ریاست میں نئے وزیر اعلیٰ کی تلاش میں ہے۔ بی جے پی لیجسلیٹیو پارٹی میٹنگ میں بی جے پی لیڈر سمبت پاترا اور ترون چُگ بھی موجود تھے۔ سمبت پاترا منی پور کے انچارج ہیں۔ سابق وزیر اعلیٰ این برین سنگھ نے قانون ساز پارٹی کے لیڈر منتخب ہونے والے کھیم چند سنگھ کو مٹھائی پیش کرتے ہوئے مبارکباد دی۔ یمنم کھیم چند سنگھ کی عمر 62 سال ہے اور وہ یکم مارچ 1963 کو پیدا ہوئے تھے۔ یمنم کھیم چند سنگھ کو منی پور میں ایک تجربہ کار اور طاقتور رہنما سمجھا جاتا ہے۔ وہ سنگجمی اسمبلی حلقہ کی نمائندگی کرتے ہیں۔
