نئی دہلی ، شاہی امام مسجد فتح پوری دہلی مفکر ملت مولانا ڈاکٹر مفتی محمد مکرم احمد نے جمعہ کی نماز سے قبل خطاب میں مسلمانوں سے اپیل کی کہ شب قدر کی شب بیدار ی کریں اور اعتکاف کی پابندی کرکے اللہ کی رضا حاصل کریں نیز اپنے لئے اور امت مسلمہ کے لئے دعا کریں ۔عید کے دن صبح صادق طلوع ہوتے ہی صدقہ فطر واجب ہو جاتا ہے اگر عید کے دن سے پہلے بھی دینا چاہیں تو جائز ہے ۔باپ نہ ہو تو دادا باپ کی جگہ پر صدقہ فطر اپنے فقیر و یتیم پوتے پوتیوں کیطرف سے ادا کرے ۔صدقہ فطر کی مقدار گیہوں یا اس کا آٹا یا ستو آدھا صاع ( دو کلو پینتالیس گرام تقریبا) کھجور، منقٰی یاجو یاا سکا آ ٹا ایک صاع دیا جائے گا ۔یعنی چار کلو نوے گرام تقریبا ۔متوسط شخص صدقہ فطر ۵۷روپئے فی کس اور متمول شخص ایک سو روپے فی کس ادا کرے جتنا زیادہ دیں گے اتنا ہی ثواب ہے ۔مفتی مکرم نے کہااین سی ای آر ٹی نے دسویں اور بارہویں جماعت کے نصاب کی کتابوں میں سے مغلیہ عہد کی تاریخ پر مشتمل ابواب کو نکال دیا ہے یہ ملک کے مفاد میں نہیں ہے۔ انہوںنے قومی کونسل برائے فروغ اردو زبان ( این سی پی یو ایل ) کی گورننگ باڈی کی جلد تشکیل کئے جانے کا مطالبہ کیا تاکہ اردو زبان کے فروغ کے لئے تمام اسکیمیں جاری رہ سکیں ۔مفتی مکرم نے سویڈن کی عدالت کے ذریعہ قرآن پاک نذرآتش کرنے پر پابندی کوکالعدم قرارد ینے والے فیصلہ پر شدید رنج وغم کا اظہار کیا اور مطالبہ کیا کہ او آئی سی اور مسلم ممالک عالمی عدالت سے رجوع کرکے مقدس کتاب کے احترام کےلئے کوئی قانون پاس کرائیں ۔مقدس کتابوں اور مقدس شخصیات کو اظہار رائے کی آزادی سے باہر رکھا جانا چاہئے ۔سویڈن کو بھی اس پر نظر ثانی کرنی چاہئے ۔انہوںنے کہا کہ قرآن کریم ایک مقدس کتاب ہے جس میںامن و امان اور انسانی اقدار کو فروغ دینے کا پیغام دیا گیا ہے ۔
