کانپور ، ،سماج نیوز سروس: شہر کی معروف دینی درسگاہ دارالعلوم زکریا، جوہی نہریا، کانپور کا سالانہ جلسہ دعائیہ، تقسیمِ اسناد و انعامات” زیرِ سرپرستی مہتمم مدرسہ مفتی محمد سعید خاں قاسمی نہایت تزک و احتشام کے ساتھ منعقد ہوا۔ تقریب سے خطاب کرتے ہوئے جمعیۃ علماء اترپردیش کے ناظمِ اعلیٰ مولانا امین الحق عبداللہ قاسمی نے موجودہ دور کے فتنوں اور نئی نسل کے ایمان پر پڑنے والے اثرات پر تفصیلی روشنی ڈالی۔ انہوں نے فرمایا کہ آج کے دور میں مسلمانوں کے سامنے سب سے بڑا چیلنج غربت یا جہالت نہیں، بلکہ اپنی اور اپنی نسلوں کے ایمان و عقیدے کا تحفظ ہے۔ ایمان کوئی وراثت نہیں بلکہ ایک امانت ہے، جس کی نگرانی نہ کی جائے تو اس کے ضائع ہونے کا اندیشہ رہتا ہے۔مولانا نے موبائل اور سوشل میڈیا کے بے جا استعمال پر فکر مندی کا اظہار کرتے ہوئے کہا کہ آج انٹرنیٹ کے ذریعے نئی نسل کے ذہنوں میں ’دین بیزاری‘ انجیکٹ کی جا رہی ہے۔ انہوں نے زور دیا کہ مدارس ایمان بناتے اور بچاتے ضرور ہیں، لیکن جب تک گھروں کا ماحول دینی نہیں ہوگا، بچوں کی مکمل تربیت ممکن نہیں۔ والدین کی ذمہ داری ہے کہ وہ بچوں کو ایمانی ماحول فراہم کریں۔ جمعیۃ علماء شہر کانپور کے سکریٹری مولانا انصار احمد جامعی نے مدارسِ عربیہ کی اہمیت بیان کرتے ہوئے کہا کہ اللہ تعالیٰ نے قرآن کریم کے الفاظ، لب و لہجے اور معانی کی حفاظت کے لیے ان مدارس کا انتخاب فرمایا ہے۔ انہوں نے کہا کہ قرآن کے الفاظ میں وہ تاثیر ہے کہ اسے سن کر لوگوں کے دل بدل جاتے ہیں۔ یہ مدارس ہی ہیں جو قرآن کی عملی اور لفظی حفاظت کا فریضہ انجام دے رہے ہیں۔ مدرسہ فاروقیہ کے استاذ قاری محمد آصف ثاقبی نے بھی خطاب فرمایا۔پروگرام میںتعلیمی سال میں نمایاں کارکردگی کا مظاہرہ کرکے اعلیٰ نمبرات سے کامیاب ہونے والے طلبہ کو شیلڈز اور گراں قدر انعامات سے نوازا گیا۔ تقریب کا آغاز تلاوتِ کلام اللہ سے ہوا، جبکہ مولوی محمد مسعود جامعی نے نعت و منقبت کا نذرانہ پیش کیا۔ نظامت کے فرائض مدرسہ کے استاذ مولانا محمد سہیل قاسمی نے بحسن و خوبی انجام دیے۔اس موقع پر شہری جمعیۃ کے نائب صدر مولانا محمد انیس خاں قاسمی، قاضی شریعت مولانا محمد انعام اللہ قاسمی، مولانا محمد اویس جامعی، مولانا محمد عبید قاسمی، حافظ محمد عمران، حاجی عزیز الدین، محمد محب اللہ خان، حافظ نوشاد، قاری حشمت علی کے علاوہ کثیر تعداد میں مقامی عوام موجود تھے۔ مہتمم مدرسہ مفتی محمد سعید قاسمی نے تمام مہمانوں اور شرکاء کا شکریہ ادا کیا۔
