کانپور ، عیدگاہ میں جگہ نہ مل پانے پر بدرجہ مجبوری سڑک پر پڑھی گئی نماز کے بعد سینکڑوں کی تعداد میں نمازیوں کے اوپر کئے جانے والے مقدمات پر سخت افسوس کا اظہار کرتے ہوئے جمعیۃ علماء اترپردیش کے نائب صدر مولانا امین الحق عبداللہ قاسمی نے کہا کہ پورے سال میں عیدگاہ میں صرف دو نمازیں ہوتی ہیں، عیدگاہ میں نماز پڑھنے کی فضیلتیں ہیں جس کی وجہ سے ہر مسلمان عیدگاہ جانا چاہتا ہے۔ لاکھوں کی مسلم آبادی والے شہرکی عیدگاہ میں لاکھ دو لاکھ لوگوں کا پہنچ جانا کوئی بڑی بات نہیں ہے۔ مولانا نے کہا کہ خدا کی عبادت کرنے پر مقدمہ درج کرنا بھارت کی روح کے منافی ہیں، ایسا کرکے ایک ہندوستانی قوم کے طور پر ہم دنیا کو کیا پیغام دینا چاہتے ہیں؟ شہری افسران کو ایک سنجیدہ اور ذمہ دارمنتظم ہونے کا ثبوت دیتے ہوئے فوری طور پر تمام مقدمات واپس لے کر سابقہ کی طرح آئندہ بھی عیدگاہوں میں جگہ کا انتظام کرنے میں معاون و مددگار کی حیثیت سے ساتھ دینا چاہئے۔مولانا عبداللہ قاسمی نے کہا کہ ہمیں قوی امید ہے کہ مقدمات واپس لے لئے جائیں گے، اگر ایسا نہ ہوا تو جمعیۃ علماء قانون کے دائرے میں رہتے ہوئے ہر قسم کی لڑائی لڑنے کو تیار ہے۔
