پیرس، (اسپوتنک) فرانس کے صدر ایمانوئل میخواں نے کہا ہے کہ فرانس اسرائیل کے ساتھ بات چیت کے لیے لبنان کی تیاری میں مدد کرے گا۔مسٹر میخواں نے منگل کو لبنانی وزیر اعظم نواف سلام کے ساتھ ایک مشترکہ پریس کانفرنس میں کہا، "ہم لبنانی حکومت کو ان مذاکرات کی تیاری اور مکمل خودمختاری کی بحالی کے لیے ضروری منصوبے تیار کرنے میں، ممکنہ حد تک ضروری مدد فراہم کریں گے۔”انہوں نے مزید کہا کہ فرانس آنے والے دنوں میں لبنان کو تقریباً 10 ٹن امداد بھی بھیجے گا، جس سے فرانس کی طرف سے دی جانے والی انسانی امداد کی کل مقدار 70 ٹن تک پہنچ جائے گی۔مسٹر میکرون نے کہا کہ فرانس 2026 کے آخر میں ’لبنان میں اقوام متحدہ کی عبوری فورس‘ (یواین آئی ایف آئی ایل) کے قیام امن مشن کی تکمیل کے بعد بھی لبنان میں اپنی فوجی موجودگی برقرار رکھنے کے لیے تیار ہے۔ انہوں نے کہا، "اگر لبنان چاہتا ہے تو، فرانس بھی سال کے آخر میں یو این آئی ایف آئی ایل کے منصوبہ بند انخلاء کے بعد اپنے سب سے فعال شراکت داروں کے ساتھ مل کر زمینی سطح پر اپنی وابستگی جاری رکھنے کے لیے تیار ہے۔ یہ سب ایک ایسی فریم ورک کے اندر ہوگا، جس کی ہمیں مل کر وضاحت کرنی ہوگی۔”اقوام متحدہ کے مشن میں شرکت کے علاوہ فرانس لبنانی فوج کو ٹریننگ بھی دے رہا ہے اور اسے ہتھیار و آلات بھی دستیاب کرا رہا ہے۔
