جنک پور،سماج نیوز سروس :غریب بچوں کوتعلیم سے جوڑنے اورتمام سہولیات فراہم کرنے کے لئے مدرسۃ الہدیٰ سوسائٹی کی جانب سے امسال بھی مفت کتابیں تقسیم کی گئیں۔ کتاب تقسیم کئے جانے کے موقع پرمہمان خصوصی کے طورپرمکتشیورناتھ مہادیومندرکے مہنت پردیپ پانڈے نے شرکت کی۔ انہوں نے اس موقع پرتعلیمی بیداری اوربچوں کو تعلیم سے جوڑنے پرایک اہم تقریرکی۔ اس موقع پر گنگا جمنی تہذیب کی ایک خوبصورت مثال دیکھنے کوملی، جب ہندو-مسلمان، پنڈت اورمولانا ایک ساتھ جمع ہوئے۔ تقریب کی نظامت کی ذمہ داری معروف سماجی شخصیت لڈولال جیسوال اور مدرسۃ الہدیٰ کے پرنسپل مولانا وسیم احمد نے انجام دیئے۔ اس موقع پرمہمان خصوصی پردیپ پانڈے کا سوسائٹی کے سکریٹری اسرارخان اوراظہارخان نے شال پہنا کراستقبال کیا۔ مہمان اعزازی کے طورپربھگوان پورکے پردھان محمد سلمان چودھری، سمری کے گرام پردھان محمد سلمان خان، سابق گرام پردھان عبدالرحیم خان، سابق بی ڈی سی اوربزرگ شخصیت شیرمحمد خان، صحافی محمد شفیق عرف پپو، امان اللہ خان، محمد لیث خان وغیرہ کا بھی شال پہنا کراستقبال کیا گیا۔ مہمان خصوصی پردیپ پانڈے نے انے خطاب میں کہا کہ تعلیم کسی بھی معاشرے کی ترقی کی بنیاد ہے۔ یہ صرف پڑھنے اورلکھنے کے بارے میں نہیں ہے، یہ ایک شخص کی سوچنے اورسمجھنے کی صلاحیت کوفروغ دیتا ہے۔ تعلیم سے آگاہی کا مطلب لوگوں کوتعلیم کی اہمیت کوسمجھانا اورانہیں تعلیم یافتہ بننے کی ترغیب دینا ہے۔ آج بھی بہت سے ایسے شعبے ہیں، جہاں لوگ تعلیم کی اہمیت کوپوری طرح سے نہیں سمجھتے۔ خاص طورپردیہی اورپسماندہ علاقوں میں بچوں کی تعلیم کافی کمزورہے، لیکن مدرسۃ الہدیٰ کے ذمہ داران کی یہ پہل بالخصوص ڈاکٹر نثاراحمد خان اور ارشاد خان کی طرف سے جو کوششیں کی جا رہی ہیں، وہ قابل تعریف ہیں۔ لڈولال جیسوال نے اپنے خطاب میں مدرسۃ الہدیٰ کے قیام سے لے کراب تک کی تعلیمی خدمات پرتفصیلی روشنی ڈالی۔ انہوں نے بتایا کہ مدرسۃ الہدیٰ سوسائٹی تقریباً 25 سالوں سے بغیرکسی فیس کے مفت میں تعلیم فراہم کررہی ہے۔ مرحوم الحاج محمد مصطفیٰ خان، مرحوم الحاج شفیع اللہ، مرحوم انوارخان نے اپنے ساتھیوں اورمقامی لوگوں کےساتھ مل کرجو پودا لگایا تھا، آج وہ کافی بڑا اورتناورہوگیا ہے۔ بڑی تعداد میں یہاں سے بچے تعلیم یافتہ ہوکرآگے نکل رہے ہیں۔ انہوں نے کہا کہ تعلیم انسان کو خود انحصار بناتی ہے۔ ایک تعلیم یافتہ شخص زندگی میں بہترمواقع حاصل کرسکتا ہے، روزگار کی نئی راہیں کھول سکتا ہے اورمعاشرے میں باعزت زندگی گزارسکتا ہے۔ میرے چھوٹے بھائی نثاراحمدخان دہلی میں بیٹھ کربھی یہاں کے غریب بچوں کے لئے سوچتے ہیں، یہ ہمارے لئے بڑے اعزاز کی بات ہے۔ ارشاد خان نے کہا کہ ہمیں تعلیم کی اہمیت کوسمجھنا چاہئے اوردوسروں کوبھی آگاہ کرنا چاہئے۔ تعلیم کے لئے بچوں کو جس طرح کی بھی ضرورت پڑے، ہم تعاون کے لئے تیار ہیں۔ سوسائٹی کے سکریٹری اسراراحمد خان، نائب صدرنصرالدین خان، نائب منیجراظہارخان، سماجی کارکن ارشاد خان، نوشاد خان نے سبھی مہمانوں کا شکریہ ادا کیا۔ اس موقع پربی ڈی سی عتیق الرحمٰن، راجیش جیسوال، پنٹوبھائی، صلاح الدین خان، محمد ایوب راعینی، عبداللہ راعینی، محمد الطاف، شکیل احمد، شبیراحمد، پیارے یادو، عبدالطیف وغیرہ کے علاوہ مدرسۃ الہدیٰ سوسائٹی کے ذمہ داران، سرپرست اورمقامی لوگوں نے خصوصی طورپرشرکت کی۔
