ناظم بیگ
بلند شہر،سماج نیوز سروس: نئے سال کے مو قع پر جے ایس پی جی کالج سکندرآباد کے زیراہتمام ہائی وے 34 پر واقع سوامی دیال بھٹناگر لاء کالج کے آڈیٹوریم میں ایک عظیم الشان مشاعرہ اورکوی سمیلن کا انعقاد کیا گیا۔ باہر سے آئے ہوئے نامور شاعروں اور ادیبوں نے اپنے منفر د کلام سے سامعین کو محظوظ کیا ۔پروگرام کا افتتاح مہمان خصوصی ایم ایل سی شری چند شرما، مہمان ذی وقار سکندرآباد ایم ایل اے لکشمی راج سنگھ اورسکندرآباد نگر پا لیکا چیئر مین ڈاکٹر پردیپ دیکشت نے چراغ جلا کر کیا۔ کالج انتظامیہ کی جانب سے منیجر نتن بھٹناگر نے تمام مہمانوں اور شعراء کا شال اور یادگاری نشانات دے کر استقبال کیا۔ مشاعرہ اورکوی سمیلن میں حب الوطنی، مزاح، رومانوی اور سماجی مسائل پر شاعروں اورکویوں نے اپنا کلام پیش کر کے خوب واہ واہی لوٹی ۔ پِلکھوا کے مزاحیہ شاعر بلویر سنگھ کھچڑی نے اپنی مزاحیہ نظموں سے سامعین کو مسحور کر دیا۔ اکشے پرتاپ اکشے نے حب الوطنی پر مبنی نظم پڑھ کر لوگوں کو ان کی حب الوطنی سے آگاہ ہونے کی ترغیب دی۔ عالمی شہرت یافتہ شاعرہ ہمانشی بابرہ نے اپنی شاعری سے سامعین کے دل جیت لیے۔ علی گڑھ سے تعلق رکھنے والے جانی فاسٹر اور ڈاکٹر دولت رام شرما نے بھی اپنا عمدہ کلام پیش کرکے سامعین کے دلوں کو چھو لیا۔ کوی دو یہ ہنس دیپک اور شاعرہ نصرت نور بانو نے بھی اپنی نظموں سے سامعین کے دل موہ لیے۔ حاضرین نے سبھی شاعروں اورکویوں کو بے حد پسند کیا نیز ان کی حوصلہ افزا ئی کی ۔ پروگرام کے آخر میں منتظمین نے تمام شعراء کا شکریہ ادا کیا۔ مشاعرہ دیررات تک جاری رہا۔ جس میں نئے سال کی تقریب کو مزید یادگار بنا دیا۔ پروگرام کی نظامت ڈاکٹر فاروق خان نے کی۔ اس موقع پر کالج سکریٹری نتن بھٹناگر نے پروگرام میں شرکت کرنے والے سبھی حضرات کا تہہ دل سے شکریہ ادا کیا۔اس موقع پر پروفیسر سپنا اپریتی، رام موہن وشسٹھ، نیلم دویدی، اروند کمار، دیپک دویدی، مینک سکسینہ، اتل گوتم، راجندر شرما، اومیش سکسینہ، دیپک شرما، آدرش بھوشن، راجکمار شرما اور پورا عملہ موجود تھا۔
