مغربی بنگال کی وزیر اعلی اور ٹی ایم سی سپریمو ممتا بنرجی نے پی ایم مودی پر سخت تنقید کرتے ہوئے کہا یہ کام سادھو سنتوں کا ہے ، راہل گاندھی نے کہا 22؍جنوری کا پروگرام بی جے پی کا سیاسی پروگرام ہے
انتخابات پر کیا ہے ملک کی سیاست ؟
ہندی بیلٹ میں رام مندرتعمیر کا زیادہ اثر
بی جے پی ہندی بیلٹ ووٹ بینک پر نظر
ممتا بنرجی کی نظر مغربی بنگال کے ووٹ بینک پر
کانگریس فی الحال خود کو ہندی بیلٹ سے دورکیا
نئی دہلی : سماج نیوز سروس:عام انتخابات 2024؍کے لوک سبھا انتخابات پر سب کی نظر ، موجودہ سیاست کا عوام پر کس کا ہوگا اثر۔ یہ بات اس لیے کہی جا رہی ہے کہ ایک طرف جہاں بی جے پی نے یہ طے کر لیا ہے کہ وہ ہندوتوا کے ایجنڈے پر عوام کے درمیان جائے گی اور ایودھیا میں تعمیر ہوئے رام مندر اس کی تیسری مرتبہ حکومت قائم کرنے میں اہم کردار ادا کرے گا وہیں دوسری طرف کانگریس اور دیگر اپوزیشن پارٹیوں نے ملک کے بنیادی مسائل کو اپنا ایجنڈہ قرار دیتے ہوئے بی جے پی کی فرقہ وارانہ مہم کے خلاف مورچہ کھول دیا ہے۔ 22؍جنوری کو ایودھیا میں ہو رہی پران پرتشٹھا تقریب کو کامیاب بنانے اور اس کو کیش کرنے کے لیے جہاں بی جے پی پوری طاقت جھونک رہی ہے وہیں اپوزیشن نے اس کو ناکام کرنے کے لیے اس کو سیاسی تقریب ثابت کرنے کی مہم چلا رکھی ہے۔ پران پرتشٹھا تقریب کے مقابلہ کانگریس پارٹی کی جانب سے بھارت جوڑو نیائے یاترا کا آغاز منی پور سے کیا گیا ہے جبکہ مغربی بنگال کی وزیر اعلی اور ٹی ایم سی سپریمو ممتا بنرجی نے اعلان کیا ہے کہ وہ 22؍جنوری کو مغربی بنگال میں سدبھاونہ ریلی کا انعقاد کریں گی۔ انڈیا اتحاد میں شامل سبھی پارٹیوں نے اعلان کر دیا ہے کہ وہ بی جے پی کی جانب سے منعقد ہونے والی ایودھیا میں تقریب میں شرکت نہیں کریں گی بلکہ عوام کے جو اہم مسائل ہیں ان کو اٹھانے کا کام کریں گی۔نیائے یاترا کے تیسرے دن راہل گاندھی نے ناگالینڈ کی راجدھانی کوہما میں پریس کانفرنس سے خطاب کرتے ہوئے کہا کہ ایودھیا میںجو 22؍جنوری کو تقریب منعقد کی جا رہی ہے وہ نریندر مودی کی سیاسی تقریب ہے ۔انھوں نے کہا کہ جب یہ آر ایس ایس اور بی جے پی کی تقریب ہے تو اس لیے کانگریس کے صدر ملکا ارجن کھڑگے نے ان کے دعوت نامہ کو قبول نہیں کیا اور تقریب میں شرکت کرنے سے انکار کر دیا ۔انھو ں نے کہا کہ ہندوئوں کا ایک بڑا طبقہ بھی یہی تصور کرتا ہے کہ 22؍جنوری کی تقریب پوری پوری سیاسی تقریب ہے اور اس کا مذہب سے کوئی سروکار نہیں ہے ۔ دوسری جانب ممتا بنرجی نے اعلان کیا گیا ہے کہ وہ 22؍جنوری کو کالی گھاٹ مندر میں دیوی کالی کی پوجا کرنے کے بعدجنوبی کولکاتہ کے ہاجرا کراسنگ سے سدبھاونہ ریلی کا آغاز کریں گی ۔ میڈیا سے بات کرتے ہوئے ممتا بنرجی نے کہا کہ میں سب سے پہلے کالی مندر جائوں گی ، وہاں پوجا کروں گی اور اس کے بعد سدبھاونہ ریلی میں شرکت کروں گی ۔ انھوں نے کہا کہ اس ریلی میں سبھی مذاہب کے لوگ شرکت کریں گے اور میں بھی شریک رہوں گی ۔ ممتا بنرجی نے مزید کہا کہ پران پرتشٹھا جیسی تقریب میں شرکت کرنا پجاریوں کا کام ہے ،یہ کام راج نیتائوں کا نہیں ہے۔
