وزیر اعلی دہلی اور عام آدمی پارٹی کے کنوینر اروند کیجریوال نے سپریم کورٹ کے تاریخی فیصلہ کا خیرمقدم کرتے ہوئے کہا یہ انڈیا اتحاد کی بڑی جیت،ہمارا الیکشن چوری کیا گیا تھا ، ہم یہ جیت کرچھین کر لائے ہیں، بی جے پی کو شکست دی جا سکتی ہے یہ واضح ہو گیا
میئر کے معاملہ میں کب کیا ہوا ، دیکھئے ایک جھلک
30؍جنوری کو نتیجہ کا اعلان کیا گیا تھا ،بی جے پی جیت ہوئی تھی
بی جے پی نے اسے انڈیا اتحاد کی شکست قرار دیا تھا
31؍جنوری کو آپ امیدوار نے عدالت کا دروازہ کھٹ کھٹایا
5؍فروری کو عام آدمی پارٹی سپریم کورٹ میں پٹیشن داخل کی
ممتاز عالم رضوی
نئی دہلی :عام انتخابات سے عین قبل بی جے پی کو سپریم کورٹ سے بڑا جھٹکا لگا ہے ۔ سپریم کورٹ نے منگل کو چنڈی گڑھ کے میئر کے انتخاب پر تاریخی فیصلہ سنایا۔ چیف جسٹس ڈی وائی چندرچوڑ کی سربراہی والی تین رکنی بنچ نے حکم دیا کہ میئر انتخابات میں کالعدم قرار دیے گئے 8 بیلٹ پیپرز کو درست مانا جائے گا۔ جس کے بعد عام آدمی پارٹی کے کلدیپ کمار کو میئر قرار دیا گیا۔بنچ نے کہا کہ درخواست گزار کو 12 ؍ووٹ ملے ہیں۔ آٹھ ووٹوں کو غلط قرار دیا گیا۔ بعد میں یہ آٹھ ووٹ درخواست گزار کے حق میں پائے گئے۔ اس طرح آٹھ ووٹوں کو جوڑ کر درخواست گزار کے پاس 20 ؍ووٹ ہیں۔ لہٰذا ٓپ کونسلر اور عرضی گزار کلدیپ کمار کو چنڈی گڑھ میونسپل کارپوریشن کے میئر کے عہدے کے لیے منتخب قرار دیا جاتا ہے۔ پریذائیڈنگ آفیسر انیل مسیح کا بی جے پی امیدوار کو فاتح قرار دینے کا فیصلہ غلط ہے۔بنچ نے کہا کہ پریذائیڈنگ افسر نے پہلے میئر کے انتخاب کے عمل میں غیر قانونی تبدیلیاں کیں۔ اس کے بعد اس نے 19 ؍فروری کو اس عدالت کے سامنے جھوٹ بولا۔اس سے قبل عدالت نے 30 ؍جنوری کو ہونے والی ووٹنگ کے بیلٹ پیپر کی جانچ کی۔ سپریم کورٹ نے پھر کہا کہ آپ امیدوار کے حق میں ڈالے گئے آٹھ ووٹوں پر اضافی نشانات تھے۔ عدالت نے کہا کہ نشان زدہ بیلٹ پیپرز کی گنتی کی جائے گی جس کے بعد جیتنے والے کے نام کا اعلان کیا جائے گا۔ عدالت کے تبصرے کے بعد عام آدمی پارٹی میں جشن کا سلسلہ شروع ہو گیا ۔چنڈی گڑھ کے میئر بننے والے کلدیپ کمار نے کہا کہ میں سپریم کورٹ کا شکریہ ادا کرنا چاہتا ہوں۔ یہ چنڈی گڑھ کے لوگوں اور بھارت اتحاد کی جیت ہے۔ اس سے ظاہر ہوتا ہے کہ بی جے پی ناقابل تسخیر نہیں ہے اور اگر ہم متحد رہیں تو ہم انہیں شکست دے سکتے ہیں۔پنجاب کے وزیراعلی بھگونت مان نے سپریم کورٹ کے فیصلے پر خوشی کا اظہار کیا۔ بھگونت مان نے کہا کہ آخرکار سچ کی فتح ہوئی۔ ہم چندی گڑھ میں میئر کے انتخاب کے حوالے سے سپریم کورٹ کے فیصلے کا خیرمقدم کرتے ہیں۔ سی جی آئی نے پریذائیڈنگ آفیسر کے مسترد کردہ 8 ووٹوں کو برقرار رکھا اور آپ کے کلدیپ کمار کو میئر بنانے کا اعلان کیا۔ چنڈی گڑھ کے لوگوں کو جمہوریت کی اس عظیم فتح پر بہت بہت مبارکباد۔عام آدمی پارٹی کے قومی کنوینر اروند کیجریوال نے سپریم کورٹ کا شکریہ ادا کیا ہے۔انھوں نے کہا کہ یہ انڈیا اتحاد کی پہلی جیت ہے ۔ سپریم کورٹ کا فیصلہ تاریخی ہے اور بہت بڑا فیصلہ ہے جس کے لیے میں سپریم کورٹ کا شکرگزار ہوں۔انھوں نے کہا کہ جمہوریت بچانے کے لیے سپریم کورٹ کا شکریہ۔ہمارے ووٹ تو چوری ہو گئے تھے ۔ہم چھین کر لائیں ۔اس الیکشن سے بڑا پیغام گیا ہے کہ ہم متحد ہوکر بی جے پی کو شکست دے سکتے ہیں۔ چنڈی گڑھ کانگریس نے بھی عدالت کے فیصلےپر خوشی کا اظہار کیا۔ فیصلے کو تاریخی اور جمہوریت کو بچانے والا قرار دیا گیا۔30 جنوری کو میئر انتخابات میں بی جے پی نے اتحاد کو شکست دی۔ منوج سونکر میئر بن گئے۔ آپ نے پریزائیڈنگ آفیسر پر آٹھ ووٹوں کو غلط قرار دینے کا الزام لگایا اور ہائی کورٹ کا رخ کیا۔31 جنوری کو عام آدمی پارٹی نے انتخابی دھاندلی کا الزام لگاتے ہوئے پنجاب اور ہریانہ ہائی کورٹ کا رخ کیا۔ فی الحال کوئی فوری ریلیف نہیں ہے۔ عدالت نے چندی گڑھ انتظامیہ کو نوٹس جاری کرتے ہوئے تین ہفتوں میں جواب طلب کیا ہے۔5 فروری کو عام آدمی پارٹی سپریم کورٹ پہنچی۔ سپریم کورٹ نے پریزائیڈنگ آفیسر انیل مسیح کو تنقید کا نشانہ بنایا اور کہا کہ یہ واضح ہے کہ اس نے بیلٹ پیپرز کو مسخ کیا۔ یہ جمہوریت کا مذاق ہے۔ یہ قتل ہے۔ اس آدمی کے خلاف مقدمہ چلایا جائے۔ سماعت 19 فروری کو مقرر کی گئی۔18فروری کو سپریم کورٹ میں سماعت سے ایک دن پہلے منوج سونکر نے میئر کے عہدے سے استعفیٰ دے دیا۔ اس کے ساتھ ہی عام آدمی پارٹی کے تین کونسلر پارٹی چھوڑ کر بی جے پی میں شامل ہو گئے۔19 فروری کو سپریم کورٹ نے انیل مسیح کو پھٹکار لگائی۔ بیلٹ پیپرز کے لیے بلایا اور 20 فروری کو دوبارہ سماعت مقرر کی۔
