نئی دہلی 06دسمبر،:،ہمارا سماج:حج کمیٹی آف انڈیا کی جانب سے حج بیت اللہ2024 کے لیے فارم بھرنے کے اعلان کے بعد4؍دسمبر 2023سے حج فارم بھرنے کے سلسلے کا آغاز ہو چکا ہے اور دہلی اسٹیٹ حج کمیٹی میں مقدس سفرحج پر جانے کے لیے خواہشمند عازمین حج کی آمدشروع ہوگئی ہیں۔دہلی اسٹیٹ حج کمیٹی کے دفتر، حج منزل، ترکمان گیٹ پر اب تک تقریباً100حج فارم بھرے جا چکے ہیں۔اس درمیان آج مورخہ6؍دسمبر 2023کو دہلی اسٹیٹ حج کمیٹی کی چیئر پرسن محترمہ کوثر جہاں نے حج کمیٹی کے دفتر میں فارم بھرنے کے لیے موجود درخواست گذار عازمین حج سے ملاقات کی اور انہیںحج بیت اللہ کے لیے منتخب کیے جانے کے لیے نیک خواہشات اور مبارکباد پیش کی۔محترمہ کوثر جہاں نے اس سلسلے میں حج فارم بھرنے والے عازمین سے یہ بھی درخواست کی کہ وہ اپنے اپنے علاقہ اور محلوں میں حج کا ارادہ رکھنے والے لوگوں کو اس کی معلومات فراہم کریں اور اگر کسی کو کسی بھی قسم کی دقت اور پریشانی کا سامنا ہو تو دہلی اسٹیٹ حج کمیٹی کے دفتر سے رابطہ قائم کریں۔ہماری پوری کوشش ہوگی کہ ان کے مسائل کا بروقت حل کیاجا سکے۔معلوم ہوکہ حج بیت اللہ2024کے لیے آن لائن درخواست فارم بھرنے کے لیے 4؍دسمبر2023 سے20؍دسمبر2023تک کی مدت مقرر کی گئی ہے۔
