نئی دہلی،پریس ریلیز،ہمارا سماج : حج 2026 کے عازمینِ حج کو دہلی کے تاریخی رام لیلا میدان میں دہلی اسٹیٹ حج کمیٹی کی جانب سے قائم حج کیمپ سے اندرا گاندھی بین الاقوامی ہوائی اڈہ کے ٹرمینل-3 تک ایئرپورٹ ایکسپریس میٹرو کے ذریعے پہنچایا گیا۔دہلی اسٹیٹ حج کمیٹی کی جانب سے عازمینِ حج کو بسوں کے بجائے میٹرو کے ذریعے ہوائی اڈہ تک پہنچانے کی یہ قابلِ تعریف کوشش، ایران، امریکہ اور اسرائیل کے درمیان خلیجی جنگ کے اثرات کے نتیجے میں عالمی سطح پر پیدا ہونے والے معاشی بحران اور مہنگائی کے پیش نظر کی گئی ہے۔ حالیہ دنوں میں وزیر اعظم نریندر مودی نے ملک کے عوام سے اپیل کی تھی کہ وہ اپنی ذاتی اور سماجی زندگی میں کفایت شعاری اختیار کریں، غیر ضروری اخراجات کم کریں اور ایندھن کے ممکنہ بحران سے نمٹنے کے لیے میٹرو اور ٹرین کے استعمال کو ترجیح دیں۔ دہلی حج کمیٹی کا یہ قدم اسی پیغام کو عملی شکل دینے کی کوشش ہے۔ وزیر اعظم کی اپیل اور ملک کے تئیں ان کے جذبہ خیر سگالی کو آگے بڑھاتے ہوئے دہلی حج کمیٹی نے فیصلہ کیا کہ عازمینِ حج بسوں اور بڑی گاڑیوں کے قافلوں کے بجائے دہلی میٹرو کی ایئرپورٹ ایکسپریس لائن کے ذریعے نئی دہلی میٹرو اسٹیشن سے آئی جی آئی ایئرپورٹ ٹرمینل-3 تک سفر کریں۔ اس اقدام سے ایندھن کی بچت ہوگی، ماحولیاتی تحفظ کو فروغ ملے گا اور عوام میں پبلک ٹرانسپورٹ کے استعمال کے تئیں بیداری بڑھے گی۔ اس خصوصی موقع پر نئی دہلی ایئرپورٹ ایکسپریس میٹرو اسٹیشن پر عازمینِ حج کو روانہ کرنے کے لیے دہلی اسٹیٹ حج کمیٹی کی چیئرپرسن کوثر جہاں، ایگزیکٹو آفیسر اشفاق احمد عارفی، ڈپٹی ایگزیکٹو آفیسر محسن علی اور دہلی انٹرنیشنل ایئرپورٹ لمیٹڈ، دہلی پولیس، سعودی ایئر لائنس، حج کمیٹی آف انڈیا اور دیگر متعلقہ ایجنسیوں کے افسران بھی موجود تھے اور انہوں نے نئی دہلی ایئرپورٹ ایکسپریس میٹرو اسٹیشن سے اندرا گاندھی بین الاقوامی ہوائی اڈہ ٹرمینل-3 میٹرو اسٹیشن تک عازمینِ حج کے ساتھ سفر بھی کیا۔ اس موقع پر دہلی اسٹیٹ حج کمیٹی کی چیئرپرسن کوثر جہاں نے اپنے بیان میں کہا کہ وزیر اعظم نریندر مودی نے ایندھن اور توانائی کی بچت کے لیے جو اپیل ملک کے عوام سے کی ہے، اس پر عمل کرنا ہر شہری کا فرض ہے۔ پوری دنیا توانائی کے بحران سے دوچار ہے اور اس کے منفی اثرات دیگر شعبوں پر بھی پڑ رہے ہیں۔ ہندوستان ان ممالک میں شامل ہے جس نے بحران کے باوجود کوشش کی ہے کہ اس کا اثر عام لوگوں پر کم سے کم پڑے۔ اتنے بڑے بحران کے باوجود مودی حکومت نے ایک بھی فلاحی اسکیم بند نہیں کی ہے۔ وزیر اعظم نے قومی مفاد میں سوچ سمجھ کر عوام سے توانائی کی بچت کی اپیل کی ہے اور ہم سب کی ذمہ داری ہے کہ ہم اس میں ان کا ساتھ دیں۔ واضح رہے کہ مقدس حج 2026 کے لیے دہلی سے سعودی عرب کے مقدس شہر مکہ مکرمہ روانگی کا سلسلہ گزشتہ 18 اپریل سے جاری ہے۔
