دیوبند ،سماج نیوز سروس:مسلم فنڈ ٹرسٹ دیوبند کی جانب سے عازمین حج 2026کی عملی تربیت کے لئے منعقد کیا جانے والا 32؍واں حج ٹریننگ کیمپ گزشتہ شام اختتام پذیر ہوگیا ۔دو روزہ اس ٹریننگ کیمپ میں دارالعلوم دیوبند کے علماء حضرات مفتیان کرام اور حج ٹرینرز نے کیمپ میں شرکت کرنے والے عازمین مرد وخواتین کو حج اور عمرہ کے ارکان کی تفصیلات ،ترتیب اور دعائیں بتائیں اور ارکان کی ادائیگی کا طریقہ بتایا ،مفتیان کرام اور ٹرینرز نے ماڈلوں کی مدد سے ارکان کی ادائیگی کی مشق کرائی ۔مولانا مفتی امین پالنپوری نے حج وعمرہ کی ادائیگی کا طریقہ بیان کرتے ہوئے احرام باندھنے ،طواف کرنے ،سعی کرنے ،مزدلفہ جانے ،میدان عرفات پہنچنے اور منیٰ پہنچ کر کنکریاں مارنے ،حلق کرانے اور قربانی کرنے کی تفصیلات اور ترتیب بیان کی ،حج ٹرینرڈاکٹر محمد اعظم نے عازمین کو احرام باندھنے کا صحیح طریقہ اور طواف نیز صفا ومروہ پر سعی کرنے کی عملی ٹریننگ دی ۔دارالعلوم دیوبند کے استاذ حدیث مولانا خضر محمد کشمیری نے عازمین کو مکۃ المکرمہ اور مدینہ منورہ نیز حرم شریف کے ادب واحترام اور فضیلت بیان کرتے ہوئے کہا کہ حرم شریف یعنی مسجد الحرام کا احترام ہر مسلمان پر فرض ہے کیوں کہ یہ روئے زمین پر سب سے مقدس ترین مقام ہے ۔انہوں نے کہا کہ حرم شریف میں داخل ہوتے وقت خشوع وخضوع ،اذکار ،دعائو ں کی کثرت اور احتراماً نظریں جھکاکر رکھنا ضروری ہے ۔مولانا خضر محمد نے بتایا کہ حدود حرم میں گناہ کا ارتکاب ،لڑنا ،جھگڑنا ،ہتھیار اٹھانا ،درخت کاٹنا اورکسی کو تکلیف پہنچانا حرام ہے ۔انہوں نے کہا کہ حرم مکہ میں ایک نیکی کا ثواب ایک لاکھ نیکیوں کے ثواب کے برابر ہے اسی طرح ایک نماز پڑھنے کا ثواب ایک لاکھ نمازوں کے ثواب کے برابر ہے ،اس لئے حرم میں داخل ہوتے وقت دل ودماغ میں اللہ جل شانہ کی عظمت اور اس مقام کا تقدس موجود رہنا چاہئے اس کے علاوہ نماز ونوافل کی کثرت ،تلاوت کلام پاک اور طواف پر توجہ مرکوز رہنی چاہئے ،انہوں نے کہا بلاوجہ گفتگو سے بچنا چاہئے ۔اسی طرح مدینہ منورہ اور مسجد نبوی وروضۂ رسول صلی اللہ علیہ وسلم کی اہمیت اور فضیلت بیان کرتے ہوئے مولانا موصوف نے کہا کہ مدینہ منورہ کا احترام ایمان کا حصہ ہے کیونکہ یہ سرکاردوعالم حضرت محمد مصطفی صلی اللہ علیہ وسلم کا شہر اور آرامگاہ ہے ،اس لئے روضۂ رسول کے سامنے باادب کھڑے ہونا اور ادب واحترام کرنا انتہائی ضروری ہے کیونکہ یہ مقام خانہ کعبہ سے بھی افضل ترین مقام ہے ۔اس لئے مکمل عجزوانکساری اور ادب کا مظاہرہ کرتے ہوئے سلام پیش کریں ۔اس مقام پر بلند آواز سے بات کرنے سے پرہیز کریں ،اور ہر غیر شرعی حرکات سے اجتناب کریں ،انہوں نے کہا کہ حج کی سعادت حاصل کرنے کے بعد ہماری زندگیوں میں تبدیلی آنی چاہئے اور ہمیں شرعی احکامات پر عمل کرنے اور دنیاوی لہوولعب سے ہرممکن بچنے کی کوشش کرنی چاہئے ۔اس سے قبل ڈاکٹر نواز دیوبندی نے عازمین کو درود شریف پڑھنے کے فضائل اور مقامات مقدسہ کی تاریخ اوراہمیت سے واقف کرایا اور ٹریننگ کیمپ کے اغراض ومقاصد بیان کئے ۔مولانا خضر محمد کی دعاء کے ساتھ ٹریننگ کیمپ اختتام پذیر ہوا ۔ٹریننگ کیمپ میں دیوبند ،قرب وجوار اور دور دراز کے عازمین نے شرکت کرکے استفادہ کیا ۔کیمپ کے کامیاب انعقاد میں ادارہ کے منیجر ،فیضی صدیقی ،اسرار احمد ،ڈاکٹر ذوالفقار ،ڈاکٹر فاطمہ ،شہزاد انجم ،عدیل صدیقی ،طارق عثمانی ،فہیم صدیقی اور دیگر کارکنان نے بھر پور تعاون کیا ۔
