حماس کا اسرائیل پر راکٹوں سے حملہ، تین اسرائیلی زخمی، گاڑیاں اور عمارتیں تباہ

غزہ (ہ س)۔اسرائیلی فوج کے ترجمان نے اتوار کے روز اعلان کیا ہے کہ غزہ کی پٹی سے تقریباً 10 راکٹ گولے داغے گئے اور ان میں سے زیادہ تر کو روک لیا گیا ہے۔ العربیہ کے نمائندے نے اطلاع دی ہے کہ غزہ سے فائر کیے گئے میزائلوں کی وجہ سے جنوبی اسرائیل کے اسدود اور عسقلان میں سائرن بج گئے۔انہوں نے یہ بھی کہا کہ یہ حملہ کئی مہینوں میں سب سے بڑا حملہ تھا۔ ایک میزائل عسقلان میں گرا۔ تحریک حماس کے عسکری ونگ القسام بریگیڈز نے اعلان کیا ہے کہ اس نے غزہ کی پٹی میں شہریوں کے خلاف اسرائیلی حملوں کے جواب میں اسدود شہر پر راکٹوں سے بمباری کی ہے۔اسرائیلی ایمبولینس کا کہنا تھا کہ اس کا عملہ 4 مقامات پر کام کر رہا تھا جہاں میزائل کے ٹکڑے گرے تھے۔ اسرائیلی میڈیا نے بتایا کہ یہ راکٹ اسدود اور عسقلان میں گرے تھے۔ اسرائیلی چینل 13 نے اطلاع دی ہے کہ عسقلان پر میزائل حملے کے نتیجے میں زخمی ہونے والوں کی تعداد 3 ہے۔ چینل 12 نے بتایا کہ عسقلان میں گرنے والے میزائل نے عمارتوں اور کاروں میں بڑی تباہی مچائی ہے۔اسرائیلی وزیر خزانہ سموٹریچ نے کہا ہے کہ غزہ سے راکٹ داغے جانے کے بعد اب حماس کو ختم کرنے سے پہلے رکنے کی ضرورت نہیں ہے۔ اسرائیل پر غزہ سے راکٹ داغنے کی رفتار حالیہ مہینوں میں 7 اکتوبر 2023 کو حماس کے غیر معمولی حملے کے بعد شروع ہونے والی جنگ کے آغاز کے مقابلے میں کم ہوئی ہے۔فلسطینی وزارت صحت نے اتوار کو اعلان کیا کہ 7 اکتوبر 2023 سے اب تک اسرائیلی فوج کے بدترین قتل عام میں مرنے والوں کی تعداد 50,695 اور زخمیوں کی تعداد 115,338 ہوگئی ہے۔ اٹھارہ مارچ کے بعد سے اب تک 1335 افراد شہید اور 3297 زخمی ہو چکے ہیں۔