بلند شہر، فوج میں تعینات جوان کی منگنی کی تقریب کے دوران ہر ش فائرنگ سے دولہے کا ایک دوست ہلاک جبکہ دوسرا دوست زخمی ہوگیا۔ یہ واقعہ اتوار کی سہ پہر تین بجے کے قریب پیش آیا۔ دولہے کے نابالغ بھائی نے لائسنسی ڈبل بیرل بندوق سے فائرنگ کی۔ اس کے بعد وہ فرار ہوگیا۔ واردات کے بعد خوشی کی فضا سوگ میں بدل گئی، مہلوک کے اہل خانہ نے پو لیس میں شکا یت درج کرائی ہے ۔ اطلاع کے مطا بق تھانہ بی بی نگر حلقہ کے گلاؤٹھی روڈ ساکن فوج میں تعینات سپاہی دیپک کمار کی منگنی کی تقریب اتوار کو اپنے گھر کے صحن میں چل رہی تھی۔ اس دوران اسکے چھوٹے بھائی نے لائسنسی ڈبل بیرل بندوق سے فائرنگ کردی۔ پاس میں کھڑے دولہے کے دوست شر د (عمر 20سال) کی کنپٹی اور علی گڑھ کے قصبہ کھیر ساکن دوسرے دوست رشی پال سنگھ کے کاندھے میں جا لگی ۔دونوں لہولہان ہوکر زمین پر گر گئے ،جنھیں فوری طور پر اسپتال لے جا یا گیا جہا ں ڈاکٹروں نے شر د کو مردہ قرار دیدیا ،جبکہ رشی پال زیر علاج ہے ۔ بتایا گیا ہے کہ رشی پال بھی دیپک کے ساتھ فوج میں تعینات ہے۔ ادھر واردات کی اطلاع ملتے ہی ایس ڈی ایم سیانہ مدھومیتا سنگھ، سی او وندنا شرما اور دیگر پولیس افسران موقع پر پہنچے۔ واردات کے بعد فرار ہوئے ملزم کی تلاش کی جارہی ہے ۔ایس پی سٹی سریندر نا تھ تیواری نے بتایا کہ تحریر کی بنیاد پر ملزم وشال چودھری کے خلاف رپورٹ درج کرکے سخت کارروائی کی جائے گی ،بندوق کس کے نام پر ہے اس کی بھی جانچ کی جارہی ہے۔وا ضح ہوکہ مہلوک شرد پچھلے سال بی اے پاس کرنے کے بعد پولیس میں بھرتی کی تیاری کر رہا تھا۔ اس کیلئے وہ ہاپوڑ میں کوچنگ بھی کر رہاتھا ،اس کی موت سے اہل خانہ کا رورو کر براحال ہے ۔ذرائع کاکہناہے کہ پو لیس کی لاکھ کوششوں کے باوجود ہرش (خوشی )فا ئرنگ پر کوئی سخت قدم نہیں اٹھایا جارہا ہے ،آئے دن اس طرح کے واقعات پیش آتے رہتے ہیں ،جبکہ آنے والے دنوں میں شادیوں کا سیز ن شروع ہورہا ہے ،لہٰذا محکمہ پو لیس کو خوشی فائر نگ کی روک تھام کیلئے ٹھوس اقدامات کئے جانے چاہئیں ۔
