لبنان:اسرائیلی نشریاتی ادارے نے بعض رپورٹوں کے حوالے سے بتایا ہے کہ لبنانی تنظیم حزب اللہ جمعے کے روز اپنے سکریٹری جنرل حسن نصر اللہ کے جنازے اور تدفین کی تیاری کر رہی ہے۔ حزب اللہ نے سرکاری طور پر نصر اللہ کے جنازے کی تاریخ کے بارے میں کوئی بات نہیں کی ہے۔ حزب اللہ کا سربراہ گذشتہ جمعے کے روز بیروت کے جنوبی نواحی علاقے الضاحیہ میں اسرائیل کی شدید فضائی بم باری میں ہلاک ہو گیا تھا۔ نصر اللہ کی ہلاکت کی تصدیق ہفتے کے روز کی گئی۔حزب اللہ کی جانب سے جاری بیان میں نصر اللہ کی ہلاکت کی تفصیلات یا جنازے کی تاریخ کے بارے میں نہیں بتایا گیا تھا۔ لبنانی حکومت نے سرکاری طور پر تین روز کے سوگ کا اعلان کیا۔بم باری کے مقام سے حسن نصر اللہ کی لاش اٹھانے والے ذرائع نے بتایا کہ جسم پر براہ راست زخم نہیں پائے گئے۔ بظاہر لگتا ہے کہ موت زور دار دھماکے کے سبب پہنچنے والے شدید دھچکے کے سبب ہوئی۔العربیہ اور الحدث کے ذرائع نے بتایا تھا کہ حزب اللہ کے سربراہ کی پیر کے روز ہونے والی تدفین کو غیر معینہ مدت کے لیے ملتوی کر دیا گیا۔
