اشفاق گلزار
سرینگر،سماج نیوز سروس:برف ہٹانے کے بعد سرینگر، سونہ مرگ اور گمری روڈ کو دو طرفہ ٹریفک کی آمد رفت کیلئے کھول دیا گیا جس کے بعد صوبائی کمشنر کشمیر کی جانب سے ایک خصوصی ٹریفک ایڈ وائزری بھی جاری کر دی گئی ہے ۔ سرینگر سونہ مرگ گمری روڑ کو دوطرفہ ٹریفک کی آمد رفت کیلئے بحال کردیا گیا ہے ۔ اس سلسلے میں صوبائی کمشنر کشمیر کے دفتر کی طرف سے جاری کردہ ایک سرکاری نوٹیفکیشن کے مطابق سڑک کو 15 مئی 2026 سے کھلا قرار دیا گیا ہے ۔ نوٹیفکیشن میں کہا گیا ہے کہ گاندربل، دراس اور کرگل کی ضلعی انتظامیہ گاڑیوں کی نقل و حرکت کی اجازت دینے اور ٹریفک کے اوقات کا فیصلہ کرنے سے پہلے روزانہ کی بنیاد پر موسمی ہدایات کا جائزہ لیں گی۔حکام نے ٹریفک پولیس رولر کشمیر کو سونمرگ میں ٹریفک چیک پوسٹ قائم کرنے کی ہدایت کی ہے تاکہ ٹریفک کی روانی کو یقینی بنایا جا سکے، جبکہ ریکوری وینیں پھنسے ہوئے گاڑیوں کی مدد کیلئے شاہراہ کے اوپری حصوں پر کھڑی رہیں گی۔انتظامیہ نے ایس ایس جی روڈ پر سفر کرنے والی گاڑیوں کے لیے اینٹی سکڈ چین لگانا بھی لازمی قرار دیا ہے۔ عہدیداروں نے کہا کہ سونمرگ میں مناسب وزن کے بعد صرف مقررہ وزن کی حد کے اندر گاڑیوں کو ہی چلنے کی اجازت ہوگی۔حکم نامے میں مزید کہا گیا ہے کہ رابطہ کاری اور ہنگامی ردعمل کیلئے گاندربل، دراس اور کرگل میں ٹریفک، سول، پولیس اور مکینیکل انجینئرنگ محکموں کے اہلکاروں پر مشتمل مشترکہ کنٹرول روم قائم کیے جائیں گے۔حکام نے یہ بھی مشورہ دیا کہ سڑک استعمال کرنے والی گاڑیوں کو ترجیحی طور پر فور وہیل ڈرائیو اور میکانکی طور پر فٹ ہونا چاہیے، جبکہ ڈرائیور کو تجربہ کار اور پہاڑی علاقوں سے واقف ہونا چاہیے۔
