شعیب رضا فاطمی
نئی دہلی، اب حج 2023کے آپریشن کیلئے اقلیتی وزیر اسمرتی ایرانی پوری طرح تیار ہیں ،اور بہت جلد وہ کچھ ایسے اعلانات بھی کرنے والی ہیں جس سے ہندوستانی مسلمانوں با لخصوص وہ مسلمان جن کی دیرینہ خواہش کم از کم ایک بار حج کرنے کی ہوتی ہے۔وہ اپنی گاڑھی کمائی سے پس انداز کرکے اخراجات کا انتظام بھی کر لیتے ہیں لیکن وہ مختلف سرکاری پالیسیوں میں الجھ کر مایوس ہو جاتے ہیں۔لیکن اب ایسا لگتا ہے کہ اقلیتی وزیر اسمرتی ایرانی اس سلسلے میں عازمین حج کو بہت ساری آسانیاں فراہم۔کرنے جارہی ہیں جس کا باضابطہ اعلان مرکزی حج کمیٹی جلد ہی کرے گی۔
محترمہ اسمرتی ایرانی کابینہ وزیر برائے اقلیتی امور اور خواتین و اطفال نے پیر کے روز اردو اخبارات کے مدیران سے گفتگو کرتے ہوئے کہا کہ ہندوستانی عازمین کی دیرینہ خواہشات کو پورا کرنے کیلئے حکومت کی طرف سے سعودی عرب کے ساتھ دو طرفہ معاہدے کے تحت 2023 کے حج کیلئے 1,75,025 عازمین کا مکمل حج کوٹہ حاصل کرنے کیلئے ٹھوس کوششیں کی گئیں۔انہوں نے کہا کہ کوٹہ میں اضافہ ہندوستانی مسلم کمیونٹی کی ایک بڑی آبادی کو نسبتاً کم قیمت پر ایک اہم مذہبی فرض کو پورا کرنے کے قابل بنائے گا۔
انہوں نے نہایت تفصیل سے حج پالیسی 2023 میں ہونے والی تاریخ ساز تبدیلی کو نشان زد کرتے ہوئے کہا کہ عام آدمی کے مفاد کو مد نظر رکھتے ہوئے حج کی مجموعی لاگت کو کم کرنے کی کوششیں کی گئی ہیں۔ عازمین اب اپنے ذاتی استعمال کی اشیاء کیساتھ اپنے سفر حج کی منصوبہ بندی خود کر سکتے ہیں۔ حج پیکیج سے چھتری، چادر اور دیگر ضروری اشیا کو باہر کر دیا گیا ہے تاکہ عازمین اسے اپنی پسند اور بجٹ کے مطابق خرید سکیں۔ وزیر کے مطابق اس طرح حج کی لاگت کو 7000 روپے تک کم کر دیا گیا ہے۔ مزید ہر حاجی کی طرف سے 2100 سعودی ریال کیلئے لازمی ادائیگی کے اخراج سے حج کمیٹی آف انڈیا کے پیکیج کی لاگت میں بھی 43260روپے کی کمی ہو جائے گی۔ اس طرح حج کمیٹی آف انڈیا کے حج پیکیج کی کل لاگت میں 50000 روپے کی کمی ہو جائے گی۔حکومت کا صوابدیدی حج کوٹہ مکمل طور پر ختم کر دیا گیا ہے اور اس سے قبل معززین اور وی آئی پیز کیلئے مخصوص سیٹیں عام شہریوں کے فائدے کیلئے دستیاب کرائی جائیں گی۔ پہلی بار، حجاج کرام کے پاس اب ملک کے 25 ہوائی اڈوں سے اپنے سفر کے مقامات کا انتخاب کرنے کا اختیار ہوگا۔
پہلی بار 45 سال سے زیادہ عمر کی اکیلی حج کی خواہشمند خاتون محرم کے بغیر حج کیلئے درخواست دے سکتی ہیں۔ انفرادی خواتین کے ایسے گروپ کو حج کمیٹی آف انڈیا کی جانب سے سہولت فراہم کی جائے گی۔
پہلی بار معذور خواتین عازمین، اور بزرگ عازمین کو ترجیحی بنیادوں پر حج کیلئے سہولت فراہم کی جا رہی ہے۔ سعودی عرب میں اس برس سے حج کے دوران پہلی بار شیرخوار بچوں اور ماؤں کیلئے خصوصی انتظامات کیے جائیں گے۔ پہلی بار عازمین کو ان کے ضلعی ہیلتھ یونٹس، گورنمنٹ لیباریٹریوں بشمول گورنمنٹ آف انڈیا ہاسپٹل، ای ایس آئی سی اسپتال وغیرہ سے صحت کی تصدیق اور آر ٹی پی سی آر ٹیسٹ کروانے میں سہولت فراہم کی جارہی ہے۔
امید کی جاتی ہے کہ یہ سہولت ان عازمین کے حوالے سے حج کے مجموعی اخراجات کو مزید کم کر دے گی جو رباط کی سہولیات حاصل کرنے کے حقدار ہیں۔ پہلی بارتمام ریاستوں ؍مرکز کے زیر انتظام علاقوں کو ریاست؍ UT سروس میں ڈائریکٹر کی سطح پر ایک افسر اور ریاست؍ مرکز کے زیر انتظام علاقوں کی متعلقہ حج کمیٹی کے ایک افسر کو اپنی اپنی ریاستوں کے عازمین حج کی دیکھ بھال کیلئے تعینات کرنے کی اجازت ہوگی۔
