رائے پور،(یواین آئی )رائل چیلنجرز بنگلورو کے تجربہ کار تیز گیند باز بھونیشور کمار نے ممبئی انڈینز کے خلاف اپنی ٹیم کو سنسنی خیز جیت دلانے کے بعد ایک دلچسپ اعتراف کیا ہے۔ انہوں نے کہا کہ میچ میں چار وکٹیں حاصل کرنے کے مقابلے میں، آخری لمحات میں لگایا گیا چھکا ان کے لیے زیادہ خوش کن اور پرلطف تھا۔ممبئی انڈینز کے 167 رنز کے ہدف کا تعاقب کرتے ہوئے آر سی بی کو آخری تین گیندوں پر 9 رنز درکار تھے۔ ممبئی کے بولر راج انگد باوا نے وائیڈ یارکر کرنے کی کوشش کی، لیکن بھونیشور کمار نے گیند تک رسائی حاصل کر کے اسے ڈیپ کور کے اوپر سے چھکے کے لیے روانہ کر دیا۔ اس کے دو گیند بعد انہوں نے تیزی سے رنز مکمل کر کے آر سی بی کو فتح دلا دی۔انہوں نے کہا کہ میں نے پہلے بھی کئی بار اچھی گیند بازی کی ہے اور وکٹیں لی ہیں، لیکن سچ تو یہ ہے کہ میں نے سب سے زیادہ مزہ اس چھکے سے حاصل کیا۔ روہت شرما کے خلاف میں نے پہلے سے منصوبہ بندی کر رکھی تھی کیونکہ وہ پہلے بھی میری گیندوں پر آگے بڑھ کر کھیل چکے ہیں۔”
