عمران حسین نےنیو روڈ کے علاقہ مارواڑی کٹرا کا دورہ کیا

نئی دہلی،سماج نیوز سروس: فوڈ اینڈ سپلائی کے وزیر اور بلیمارن کے ایم ایل اے عمران حسین نے نیو روڈ پر مارواڑی کٹرا علاقے کا دورہ کیا، جہاں جمعرات کی شام کو بدقسمتی سے آگ لگنے سے 50 سے زیادہ چھوٹی اور بڑی دکانیں جل کر خاکستر ہوگئیں۔ اس دوران عمران حسین نے تاجروں سے ملاقات کی۔اس بڑے پیمانے پر آتشزدگی سے دکانوں کو نقصان پہنچا ہے ، سب سے پہلے وزیر عمران حسین نے انہیں تسلی دی اور آگ لگنے کی وجوہات کے بارے میں مکمل معلومات لیں۔ اب تک موصول ہونے والی اطلاعات سے خوش قسمتی سے آتشزدگی کے واقعے میں کسی جانی نقصان کی اطلاع نہیں ہے۔عمران حسین نے علاقے کے ایس ڈی ایم کو ہدایت کی کہ وہ مصیبت اور دکھ کی اس گھڑی میں متاثرین کا خصوصی خیال رکھیں اور مناسب مدد فراہم کریں۔ وزیر نے علاقے میں گھنی آبادی اور تنگ گلیوں کے پیش نظر راحت اور بچاؤ کارروائیوں کو انجام دینے میں ڈی ڈی ایم اے، دہلی پولیس اور خاص طور پر فائر بریگیڈ کے اہلکاروں کے کردار کی بھی تعریف کی۔ تاجروں کو یقین دلاتے ہوئے انہوں نے کہا کہ اروند کیجریوال حکومت بحران کی اس گھڑی میں تاجروں کے ساتھ کھڑی ہے اور حکومت آگ سے متاثر بازار کی بحالی میں ہر ممکن مدد کرے گی۔ وزیر نے علاقے کے ایس ڈی ایم کو آگ سے ہونے والے نقصان کی جانکاری دی۔جانچ کر کے دہلی حکومت کو رپورٹ پیش کرنے کی ہدایت دی ہے۔عمران حسین نے کہا کہ 200 فائر فائٹرز کے ساتھ 80 سے زائد فائر ٹینڈرز نے رات بھر کام کیا تاکہ بڑے پیمانے پر آگ پر قابو پایا جا سکا جس سے نئی روڈ علاقے کے گنجان آباد مارواڑی کٹرا میں 50 سے زائد دکانوں کو نقصان پہنچا۔ کٹرہ مارواڑی بازار کی تنگ گلیوں میں دکانیں ایک دوسرے سے جڑی ہونے کی وجہ سے۔فائر فائٹرز کو آگ بجھانے میں بہت زیادہ چیلنجز کا سامنا کرنا پڑا، جہاں کولنگ آپریشن جاری ہے۔