مالدیپ کے وزرا ء اوراراکین پارلیمنٹ کی غلط بیان بازی پر شدید رد عمل ظاہر کرتے ہوئے این سی پی لیڈر نے کہا ملک کے پی ایم کے خلاف اگر کوئی غیر ملکی غلط تبصرے کرتا ہے تو وہ ناقابل قبول ہوگا
شرد پوار نے اپنے بیان میں اور کیا کہا
نریندر مودی ہمارے ملک کے وزیر اعظم ہیں
ملک کے وزیر اعظم کا احترام کرنا لازمی ہے
ملک سے باہر کوئی بھی بات قابل قبول نہیں
ممبئی ؍نئی دہلی : ممبئی میں سیٹوں کی تقسیم کو لے کر منعقد ہونے والی انڈیا اتحاد کی میٹنگ سے قبل قومی اتحاد کی تصویراس وقت نظر آئی جب انڈیا اتحاد کے اہم رکن اور نیشنلسٹ کانگریس پارٹی (این سی پی ) کے صدر شرد پوار نے مالدیپ کے معاملہ میں وزیر اعظم نریندر مودی کا کھل کر دفاع کیا ۔ حالانکہ جس طرح سے شرد پوار نے پی ایم مودی کا دفاع کیا ہے اس کے سیاسی معنی و مطلب بھی نکالے جا سکتے ہیں تاہم اس کا مثبت پہلو یہی ہے کہ قومیت کے معاملہ میں ملک سیاسی اعتبار سے متحد ہے ۔وزیر اعظم نریندر مودی کے خلاف جس طرح سے مالدیپ کے وزراء اور اراکین پارلیمنٹ کی جانب سے غلط بیانی کی جا رہی ہے اس پر گھمسان مچا ہوا ہے ۔ ایسے میں شرد پوار کی جانب سے سخت تنقید کی گئی ہے ۔ انھوں نے انڈیا اتحاد کی میٹنگ سے قبل میڈیا سے بات کرتے ہوئے ملک کے وزیر اعظم کے خلاف کسی بھی غیر ملکی کے تبصرے قبول نہیں کیے جا سکتے ۔انھوں نے کہا کہ اگر کسی دوسرے ملک کا کوئی شخص، لیڈر، اہلکار یا کوئی اور ہمارے وزیر اعظم کے خلاف بولتا ہے تو اسے کسی بھی حالت میں ہم قبول نہیں کر سکتے ۔ این سی پی کے لیڈر نے کہا کہ مسٹر مودی ہمارے ملک کے وزیر اعظم ہیں اور اگر کسی بھی ملک کا کوئی بھی شخص یا کوئی لیڈر، رکن پارلیمنٹ یا کوئی بھی عہدیدار ہمارے وزیر اعظم کے بارے میں غلط تبصرہ کرتا ہے تو وہ ہمارے لئے ناقابل قبول ہے ۔ ہمیں اپنے وزیراعظم کا احترام کرنا چاہیے ۔ وزیراعظم کے خلاف ملک سے باہر کی کوئی بات قبول نہیں کی جاسکتی ۔دوسری جانب مالدیپ کے معاملہ میں حکومت ہند نے آج مالدیپ کے ہائی کمشنر کو بھی طلب کیا اور سوشل میڈیا پر کی گئی غلط بیانی کو تشویشناک قرار دیا۔
