واشنگٹن، (یو این آئی) امریکہ نے ایران کو خبردار کیا ہے کہ اگر اس نے اپنی فوجی شکست” تسلیم نہ کی تو اس کے خلاف مزید سخت ترین کارروائی کی جائے گی۔غیر ملکی خبر رساں ادارے کی رپورٹ کے مطابق واشنگٹن میں صحافیوں سے گفتگو کرتے ہوئے ترجمان وائٹ ہاؤس کیرولائن لیوٹ نے کہا کہ صدر ڈونلڈ ٹرمپ دھمکی نہیں دیتے بلکہ اپنے مؤقف پر عمل کرتے ہیں۔ ان کا کہنا تھا کہ ٹرمپ ایران میں ایسی شخصیات کو اقتدار میں دیکھنا چاہتے ہیں جو امریکہ سے دشمنی نہ کریں۔ انہوں نے خبردار کیا کہ ایران کو کسی غلط فہمی میں نہیں رہنا چاہیے۔ ایران کی قیادت ایسی نہیں ہونی چاہیے جو امریکہ کو موت کی دھمکیاں دے۔انہوں نے مزید کہا کہ اگر ایران موجودہ صورتحال کی حقیقت کو تسلیم نہیں کرتا اور اپنی فوجی شکست کو نہیں مانتا تو صدر ٹرمپ اس بات کو یقینی بنائیں گے کہ ایران پر اس سے بھی زیادہ سخت حملے کیے جائیں گے جتنے پہلے کبھی نہیں ہوئے۔اس موقع پر ایک صحافی نے سوال کیا کہ ایران میں مذاکرات کس شخصیت سے ہو رہے ہیں؟ جس کے جواب میں کیرولائن نے کہا کہ اس قسم کی معلومات حساس ہیں ابھی اس پر بات نہیں کی جاسکتی، میڈیا کو بھی ایران سے مذاکرات پر مفروضوں پر مبنی خبروں سے گریز کرنا چاہیے۔ رپورٹ کے مطابق امریکا اور اسرائیل کی ایران کے خلاف جاری جنگ چوتھے ہفتے میں داخل ہوچکی ہے، جبکہ پاکستان، ترکی اور مصر سمیت کئی ممالک جنگ کے خاتمے کے لیے ثالثی کی کوششوں میں مصروف ہیں، تاہم مذاکرات کے وقت اور مقام کے حوالے سے تاحال غیر یقینی صورتحال برقرار ہے۔ وائٹ ہاؤس کی ترجمان کیرولائن لیوٹ نے کہا ہے کہ صدر ٹرمپ ایران میں مزید اموات اور تباہی نہیں دیکھنا چاہتے، ایرانی قیادت کو چاہیے کہ شکست تسلیم کرتے ہوئے جوہری ہتھیار حاصل کرنے کی خواہشات کو ختم کر دے۔
بدھ کے روز وائٹ ہاؤس میں ایک پر ہجوم پریس کانفرنس سے خطاب کرتے ہوئے کیرولائن لیوٹ نے کہا کہ ایران کے خلاف فوجی اہداف کو تقریباً مکمل کر لیا گیا ہے۔ ایران کے ساتھ مذاکرات سے متعلق سوالات پر کیرولائن لیوٹ نے وضاحت کی کہ وہ مفروضوں پر مبنی سوالات کے جوابات نہیں دے سکتیں اور مذاکرات میں شامل شخصیات کی معلومات حساس ہونے کی وجہ سے فوری طور پر فراہم نہیں کی جا سکتیں۔ انھوں نے کہا کہ صدر ٹرمپ کی ترجیحات میں ایران میں ایسی قیادت دیکھنا شامل ہے جو امریکہ کے ساتھ دشمنی پر مبنی اقدامات نہ کرے۔
کیرولائن لیوٹ نے کہا کہ ایران کی موجودہ قیادت ایسی نہیں ہونی چاہیے جو امریکہ کو موت کی دھمکیاں دے۔ میڈیا سے بھی تاکید کی گئی کہ ایران کے ساتھ مذاکرات پر مفروضوں پر مبنی خبریں پھیلانے سے گریز کیا جائے۔ پریس کانفرنس میں ایران کے خلاف حالیہ فوجی کارروائیوں کا بھی تفصیلی ذکر کیا گیا۔ کیرولائن لیوٹ کے مطابق ٹرمپ انتظامیہ ایران کے دفاعی اور جنگی صلاحیت کو محدود کرنے کے لیے سرگرم ہے۔ گزشتہ تین ہفتوں میں ایران کے تقریباً 9000 اہداف کو نشانہ بنایا گیا، جس سے میزائل اور ڈرون حملوں میں 90 فی صد کمی آئی ہے۔ ایران کے 140 نیوی جہازوں اور 50 سمندری بارودی کشتیوں کو تباہ کیا گیا، جب کہ زیر زمین جنگی ساز و سامان، جس میں اینٹی میزائل اور لانچنگ سسٹمز شامل تھے، پر 5000 پاؤنڈ وزنی بم گرایا گیا۔ ان کارروائیوں کو ورلڈ وار ٹو کے بعد نیوی کے خلاف سب سے بڑی جنگی کارروائی قرار دیا گیا ہے۔
کیرولائن لیوٹ کے مطابق امریکہ اور اتحادیوں کے لیے ایران سے لاحق خطرات میں واضح کمی آچکی ہے، ایران کا جوہری ہتھیار بنانے کا منصوبہ ختم ہو چکا ہے اور اس کی دفاعی صلاحیت محدود ہو رہی ہے۔ آبنائے ہرمز میں موجود خطرات کو ختم کرنے کے لیے امریکی فوج مکمل فوکس کے ساتھ سرگرم ہے۔ کیرولائن لیوٹ نے کہا کہ ایران اب مذاکرات کرنے کے لیے تیار ہے اور صدر ٹرمپ اس کی بات سننے کے لیے تیار ہیں۔ ایران کے ساتھ بامعنی مذاکرات جاری ہیں، اسی وجہ سے صدر ٹرمپ نے ایران کے پاور پلانٹ اور توانائی سیکٹر پر حملوں کو عارضی طور پر معطل رکھا ہے۔
انھوں نے واضح کیا کہ ایران کو جوہری ہتھیار بنانے کی خواہشات ختم کرنی ہوں گی اور امریکا و اتحادیوں کو دھمکیاں دینا بند کرنی ہوں گی۔ اگر ایران یہ بات نہ سمجھے کہ وہ پہلے ہی شکست کھا چکا ہے، تو صدر ٹرمپ ایسی سخت کارروائیوں کا حکم دے سکتے ہیں جو پہلے کبھی نہیں دیکھی گئیں۔ صدر ٹرمپ مئی 14 اور 15 کو بیجنگ کا دورہ کریں گے۔ امیگریشن اہلکاروں کو ایئرپورٹس پر تعینات کرنے کا مقصد مسافروں کی مشکلات کو کم کرنا ہے۔ کیرولائن لیوٹ نے پاکستان میں ایران کے ساتھ مذاکرات کے امکان پر کہا کہ اس حوالے سے کافی رپورٹنگ سامنے آئی ہے، تاہم وائٹ ہاؤس سے سرکاری بیان کا انتظار کیا جانا چاہیے۔ کیرولائن لیوٹ نے اختتام پر زور دیا کہ صدر ٹرمپ ہمیشہ امن کو ترجیح دیتے ہیں اور مزید اموات و تباہی نہیں چاہتے، تاہم ایران کی آخری غلطیوں نے اسے اپنی سینئر قیادت، نیوی، ایئر فورس اور دفاعی نظام سے محروم کر دیا ہے، جس کے پیش نظر امریکا کی جانب سے ممکنہ سخت کارروائیوں کے اثرات سے ایران کو کسی بھی طرح کی غلط فہمی نہیں ہونی چاہیے۔
