حیدرآباد،پریس ریلیز،ہمارا سماج:بھارتیہ جنتا پارٹی (BJP) تلنگانہ کے ریاستی صدر نلّاری رام چندر راؤ نے اسلامی جمہوریہ ایران کے سپریم لیڈر آیت اللہ سید علی حسینی خامنہ ایؒ اور ان کے اہل خانہ کے شہادت کی اطلاع پر گہرے رنج و غم کا اظہار کرتے ہوئے دلی تعزیت پیش کی ہے۔ایران کے قونصل جنرل حیدرآباد کے نام اپنے تفصیلی تعزیتی خط میں رام چندر راؤ نے اس سانحہ پر شدید صدمہ اور افسوس کا اظہار کیا جس میں سپریم لیڈر کے اہل خانہ سمیت کئی بے گناہوں کے شہادت کی اطلاع ہے انہوں نے کہا کہ اس عظیم نقصان نے نہ صرف پارٹی قیادت بلکہ تلنگانہ کے عوام کو بھی غمزدہ کر دیا ہے۔بی جے پی تلنگانہ یونٹ اور ریاست کے عوام کی جانب سے ہمدردی کا اظہار کرتے ہوئے رام چندر راؤ نے کہا کہ غم کی اس گھڑی میں ایران کے عوام کے ساتھ یکجہتی کے ساتھ کھڑا ہونا ضروری ہے۔ اپنے پیغام میں انہوں نے کہا کہ “میری دلی یکجہتی اسلامی جمہوریہ ایران کے عوام کے ساتھ ہے میں دعا کرتا ہوں کہ اللہ تعالیٰ انہیں اس کٹھن اور آزمائشی وقت سے گزرنے کے لیے طاقت، حوصلہ اور صبر عطا فرمائے۔بی جے پی تلنگانہ کے سابق ریاستی ترجمان میر فراست علی باقری نے نئی دہلی میں آیت اللہ سید علی حسینی خامنہ ایؒ کے نمائندہ برائے ہندوستان ڈاکٹر عبدالمجید حکیم الٰہی صاحب سے ملاقات کی۔ اس موقع پر ایران کے قونصل جنرل حیدرآباد حامد احمدیہ بھی موجود تھے ملاقات کے دوران باقری نے بی جے پی تلنگانہ ریاستی صدر کی جانب سے تعزیتی پیغام اور اظہارِ یکجہتی کا خط انہیں پیش کیا۔میر فراست علی باقری نے اس موقع پر جاری تنازعے میں شہید ہونے والوں کے لیے خصوصی دعا بھی کی اور انہیں شہداء کے طور پر یاد کیا۔ انہوں نے دعا کی کہ اللہ تعالیٰ اور چہاردہ معصومینؑ کے صدقے مرحومین کو جنت الفردوس میں اعلیٰ مقام عطا فرمائے اور پسماندگان کو صبر جمیل نصیب ہو۔حیدرآباد کے چارمینار اسمبلی حلقہ کے تحت پرانی حویلی میں واقع دربارِ حسینی میں خصوصی دعائیہ مجلس کا بھی انعقاد کیا گیا،جہاں بڑی تعداد میں عوام نے شرکت کرتے ہوئے شہدائے ایران کو خراجِ عقیدت پیش کیا اور امن و استحکام کے لیے دعا کی۔بی جے پی تلنگانہ قیادت نے اپنے پیغام میں ہمدردی، اتحاد اور انسانیت نوازی کے جذبے کو دہراتے ہوئے کہا کہ ایسے المناک حالات میں عالمی یکجہتی اور مشترکہ انسانی اقدار کو مقدم رکھا جانا چاہیے۔
