اقوام متحدہ: اقوام متحدہ کے سکریٹری جنرل انٹونیو گوٹیریس نے پیر کے روز اسرائیل پر زور دیا کہ وہ مقبوضہ مغربی کنارے میں آباد کاری سے متعلق تمام سرگرمیاں فوری اور مکمل طور پر بند کرے۔ اقوام متحدہ کے ترجمان نے منگل کو یہ اطلاع دی۔ اپنے بیان میں، اقوام متحدہ کے سربراہ کے نائب ترجمان فرحان حق نے کہا کہ اسرائیلی حکومت کے ذریعہ اتوار کے روز آبادکاری کی منصوبہ بندی کے طریقہ کار میں ترمیم کے فیصلے سے انٹونیو گوٹیریس بہت پریشان ہیں۔فرحان حق نے کہا کہ ان تبدیلیوں سے مشرقی یروشلم سمیت مقبوضہ مغربی کنارے میں اسرائیلی آباد کاری کی منصوبہ بندی کے عمل کو تیزی آنے کا امکان ہے۔ گوٹیریس اگلے ہفتے اسرائیلی منصوبہ بندی کے اہلکاروں کے ذریعہ 4,000 سے زیادہ سیٹلمنٹ ہاؤسنگ یونٹس پر ممکنہ پیش رفت پر بھی کافی فکرمند تھے۔ترجمان نے کہا، "سکریٹری جنرل اس بات کا اعادہ کرتے ہیں کہ یہ بستیاں بین الاقوامی قانون کی سنگین خلاف ورزی ہیں اور ایک قابل عمل دو ریاستی حل اور منصفانہ، دیرپا اور جامع امن کے حصول میں بڑی رکاوٹ ہے۔ انہوں نے کہا کہ غیر قانونی بستیوں کی توسیع کشیدگی اور تشدد کا ایک اہم محرک ہے اور اور انسانی ضروریات کو مشکل بناتی ہے۔ انہوں نے کہا کہ سکرٹری جنرل نےاسرائیل کی حکومت پر زور دیا ہے کہ وہ اس طرح کے فیصلوں کو روکے اور اسے واپس لے اور مقبوضہ فلسطینی علاقوں میں آبادکاری کی تمام سرگرمیوں کو فوری اور مکمل طور پر بند کرے اور اس سلسلے میں اپنی قانونی ذمہ داریوں کا مکمل طور پر احترام کرے۔
