لندن: برطانوی وزیر خارجہ ڈیوڈ کیمرون نے اسرائیل کو دل کی جگہ دماغ سے سوچنے کا مشورہ دے دیا۔
غیر ملکی میڈیا رپورٹس کے مطابق برطانوی وزیر خارجہ ڈیوڈ کیمرون نے کہا ہے کہ اسرائیل کو اپنے دل نہیں دماغ سے سوچنا چاہیے، اسرائیل کے پاس دفاع کا حق ہے تاہم برطانیہ نے اسرائیل کو جوابی کارروائی کا مشورہ نہیں دیا۔کیمرون نے دعویٰ کیا کہ ایران کو دوہری ناکامی کا سامنا کرنا پڑا ہے، حملوں سے اسرائیل کو کوئی نقصان نہیں ہوا، پتا چل گیا کہ خطے میں ایران کا بُرا تاثر ہے۔ کیمرون کا کہنا تھا کہ اسرائیل نے کامیابی سے ایرانی ڈرونز مار گرائے، اگر ایسا نہ ہوتا تو ہزاروں اموات ہو سکتی تھیں۔
واضح رہے کہ اسکائی نیوز کے ساتھ ایک انٹرویو میں برطانیہ کے سیکریٹری خارجہ ڈیوڈ کیمرون کے تبصرے پر انھیں آن لائن تنقید کا سامنا ہے، ڈیوڈ کیمرون سے پوچھا گیا کہ اگر کسی دوسرے ملک نے اس کے قونصل خانے پر حملہ کیا تو برطانیہ کیا کرے گا؟ تو انھوں نے کہا کہ وہ جواب میں سخت کارروائی کریں گے۔ ہر ملک کو اس وقت جواب دینے کا حق ہے جب وہ محسوس کرے کہ اسے جارحیت کا سامنا ہے۔اسکائی نیوز کے پریزنٹر کی برلی نے اس پر کہا ’’اور ایران کہے گا کہ اس نے بھی ایسا ہی کیا۔‘‘ جس پر کیمرون نے پینترا بدلتے ہوئے کہا کہ ایران کا حملہ بڑے پیمانے پر تھا اور یہ پیمانہ ’توقع سے کہیں زیادہ‘ تھا۔
