غزہ (ہ س)۔غزہ کی سول ڈیفنس ایجنسی نے اطلاع دی ہے کہ جمعہ کو صبح سویرے اسرائیلی فضائی حملے میں جنوبی شہر خان یونس میں سات بچوں سمیت ایک ہی خاندان کے 10 افراد جان سے چلے گئے۔ایجنسی کے ترجمان محمود بسال نے اے ایف پی کو بتایا کہ اسرائیلی فضائی حملے کے بعد سات بچوں سمیت دس افراد کو ہسپتال لایا گیا جن کی موت واقع ہو گئی تھی۔ حملے میں وسطی خان یونس میں الفرا خاندان کے گھر کو نشانہ بنایا۔حملے کے بارے میں جب اے ایف پی نے رابطہ کیا تو اسرائیلی فوج نے کہا، وہ حملے کا جائزہ لے رہی ہے۔عینی شاہدین نے خان یونس میں اسرائیلی ٹینکوں کی مسلسل اور شدید فائرنگ کی اطلاع دی۔سول ڈیفنس ایجنسی نے اسرائیلی حملے میں دو افراد کی ہلاکت کی بھی اطلاع دی جس میں شمالی شہر بیت لاہیہ کے علاقے العطاطرہ میں شہریوں کے ایک گروپ کو نشانہ بنایا گیا۔اسرائیلی فوج نے کہا کہ جمعہ کے اوائل میں اس نے غزہ شہر کے مشرق میں متعدد علاقوں کے رہائشیوں کے لیے انخلاء کا’فوری اور سنجیدہ‘ انتباہ جاری کیا۔اسرائیلی فوج کے عربی زبان کے ترجمان افیخائی ادرعی نے ایکس پر کہا، "اسرائیلی افواج آپ کے علاقوں میں دہشت گردی کے بنیادی ڈھانچے کو تباہ کرنے کے لیے بڑی طاقت سے کام کر رہی ہے۔ اپنی حفاظت کے لیے آپ کو یہ علاقے فوراً خالی کر دیں اور مغربی غزہ شہر میں معلوم پناہ گاہوں میں منتقل ہو جائیں۔
