الماتی ، ( یو این آئی) ہندوستانی نشانے بازوں نیرو ڈھانڈا اور ویوان کپور نے اتوار کے روز اپنی بہترین کارکردگی کا مظاہرہ کرتے ہوئے ٹریپ مکسڈ ٹیم ایونٹ میں کانسہ کا تمغہ اپنے نام کر لیا۔ اس کامیابی کے ساتھ ہی ہندوستان نے آئی ایس ایس ایف ورلڈ کپ شاٹ گن کا اختتام ایک یادگار جیت کے ساتھ کیا ہے۔فائنل مرحلے میں نیرو اور ویوان نے پہلے 30 ٹارگٹس میں سے 24 پر درست نشانہ لگایا۔ اگرچہ ان کا مقابلہ اٹلی کی تجربہ کار جوڑی سلوانا اسٹانکو اور مورو ڈی فلپیس کے برابر رہا، لیکن کوالیفیکیشن راؤنڈ میں اٹلی کی برتری کی وجہ سے بھارتی جوڑی کو تیسری پوزیشن اور کانسہ کے تمغے پر اکتفا کرنا پڑا۔چینی تائپے کی جوڑی کن پی یانگ اور وان یو لیو نے فائنل میں 36 کا اسکور کر کے عالمی ریکارڈ قائم کیا اور گولڈ میڈل جیتا۔نیرو اور ویوان نے کوالیفیکیشن راؤنڈ میں مجموعی طور پر 143 کا اسکور کیا۔ تیسرے راؤنڈ میں دونوں نشانے بازوں نے 25-25 کا ‘پرفیکٹ اسکور کر کے فائنل میں اپنی جگہ پکی کی۔ ویوان کپور نے اپنی غیر معمولی فارم کا مظاہرہ کرتے ہوئے اپنے 75 ٹارگٹس میں سے صرف دو مس کیے۔ہندوستان کی دوسری جوڑی اہور رضوی اور پریتی دوبے 130 کے اسکور کے ساتھ 31 ٹیموں کے اس مقابلے میں 23 ویں نمبر پر رہی۔نیرو اور ویوان کے لیے یہ ورلڈ کپ کا پہلا تمغہ ہے، جو کہ ایک بڑی کامیابی سمجھی جا رہی ہے۔گزشتہ سال ٹریپ مکسڈ ٹیم ایونٹ کے اولمپک کیٹیگری میں شامل ہونے کے بعد سے یہ بھارت کا اس ایونٹ میں دوسرا تمغہ ہے۔ فائنل کے ابتدائی مرحلے میں نیرو کی جانب سے کچھ نشانہ چوک جانے کی وجہ سے ہندوستان دوسرے سے تیسرے نمبر پر آ گیا تھا، تاہم ویوان کپور کی مستقل مزاجی نے ٹیم کے لیے میڈل کو یقینی بنایا۔
