حیدرآباد، پریس ریلیز،ہمارا سماج: جاب مارکٹ میں انجینئرس کے مقابل ٹیکنیشین اور اسکل ورکرس کے لیے زیادہ مواقع موجود ہیں۔ مولانا آزاد نیشنل اردو یونیورسٹی کے زیر نگرانی چلائے جانے والے آئی ٹی آئی میں طلبہ کو اردو ذریعہ تعلیم سے ٹیکنیکل اور مختلف فیلڈز میں ہنرمند بنایا جارہا ہے۔ڈاکٹر عرشیہ اعظم حیدرآباد میں واقع آئی ٹی آئی کی پرنسپل ہیں۔ ان کے مطابق محمد احمد نام کے طالب علم نے سال 2014-16 میں مانو کے آئی ٹی آئی سے ریفریجریٹر اینڈ ایئر کنڈیشننگ کا کورس پاس کیا تھا اور فی الحال محمداحمد قطر کی ایک بین الاقوامی کمپنی میں HVAC ٹیکنیشین کے طور پر کارگذار ہیں۔شیخ ریحان، محمد احمدالدین، عبدالعلیم اور محمد عبدالمدثر نے مولانا آزاد نیشنل اردو یونیورسٹی سے الیکٹریشین ٹریڈ میں کورس مکمل کیا اور آج یہ نوجوان حکومت تلنگانہ کے الیکٹریسٹی ڈپارٹمنٹ میں سرکاری ملازمت کر رہے ہیں۔ڈاکٹر عرشیہ اعظم کے مطابق ایسی بے شمار مثالیں ہیں جس میں اردو میڈیم کے ایس ایس سی اور آٹھویں پاس طلبہ نے اردو یونیورسٹی سے آئی ٹی آئی کے مختلف ٹریڈس میں کامیابی حاصل کی اور آج ملک اور بیرون ملک سرکاری و خانگی شعبوں میں برسرکار ہیں۔ انہوں نے کہا کہ پلمبنگ کے کورس سے بھی طلبہ کو حصول روزگار میں کئی کامیابیاں ملی ہیں جس میں داخلہ کے لیے طالب علم کو آٹھویں پاس ہونا ہے۔ڈاکٹر عرشیہ اعظم نے بتایا کہ مانو آئی ٹی آئی کے اغراض و مقاصد میں معیاری تکنیکی و عصری ووکیشنل ٹریننگ فراہم کرتے ہوئے ان کے لیے روزگار کو یقینی بنانا ہے۔ ملک بھر مولانا آزاد نیشنل اردو یونیورسٹی حیدرآباد کے علاوہ آئی ٹی آئی بنگلور اور آئی ٹی آئی دربھنگہ میں بھی بڑی کامیابی سے چلا رہی ہے۔ حیدرآباد آئی ٹی آئی میں جملہ 5 کورسز دستیاب ہیں۔ داخلے کی کوئی فیس نہیں۔ ڈرافٹسمین سیول، الیکٹریشین، الیکٹرانک میکانک اور ریفریجریشن اینڈ ایئر کنڈیشننگ کے علاوہ آٹھویں جماعت کامیاب طلبہ کے لیے پلمبنگ بھی سکھائی جاتی ہے۔ آئی ٹی آئی حیدرآباد میں داخلوں کے لیے طلبہ درخواست فارم دفتری اوقات کے دوران مولانا آزاد نیشنل اردو یونیورسٹی میں آئی ٹی آئی سے حاصل کرسکتے ہیں۔ درخواست داخل کرنے کی آخری تاریخ 7 جون مقرر کی گئی ہے۔ مزید تفصیلات کے لیے یونیورسٹی ویب سائٹ www.manuu.edu.in یا فون نمبر 040-23008428/ 9440692452 پر بھی رابطہ کیا جاسکتا ہے۔ آئی ٹی آئی بنگلور میں درخواست داخل کرنے کی آخری تاریخ 3 جون ہے جبکہ 6 جون کو کونسلنگ ہوگی۔ تفصیلات 080-29742261 سے حاصل کی جاسکتی ہیں۔
