نئی دہلی،پریس ریلیز،ہمارا سماج : سینٹر فار انوویشن اینڈ انٹرپرینیورشپ (سی آئی ای) جامعہ ملیہ اسلامیہ نے پردھان منتری ویرات کا سموردھن اسکیم (وی آئی کے اے ایس پی ایم) کے تحت ’قیادت کی ترقی کی بنیادی باتیں‘ پروگرام کا پہلا بیچ کامیابی سے منعقد کیا۔ جامعہ ملیہ اسلامیہ کے پراجیکٹ کو پوری طرح سے وزارت اقلیتی امور کی طرف سے مالی اعانت حاصل ہے۔ اس سکیم کے تحت، سینٹر فار انوویشن اینڈ انٹرپرینورشپ چار سو پچاس خواتین کی قیادت اور کاروباری ترقی کے بارے میں تربیت کااہتمام کرے گا جسے پروفیسر مظہر آصف، شیخ الجامعہ،جامعہ ملیہ اسلامیہ اور پروفیسر مہتاب عالم رضوی، مسجل، جامعہ ملیہ اسلامیہ کی دور اندیش قیادت کی رہنمائی حاصل ہے۔پروگرام کا پہلا بیچ 22 اپریل 2026کو کامیابی کے ساتھ مکمل ہوا اور آٹھ مئی دوہزار چھبیس کو جامعہ ملیہ اسلامیہ میں تقسیم اسناد کی تقریب منعقد ہوئی۔ نیہا گری، آئی اے ایس، ڈائریکٹر، پی ایم وکاس، اقلیتی امور کی وزارت، حکومت ہند نے اس موقع پر بطور مہمان خصوصی شرکت کی۔تربیتی پروگرام کو کامیابی سے مکمل کرنے والے طلبہ کے ساتھ ساتھ جاری بیچوں کے شرکا کے ساتھ بات چیت کے دوران، نیہا گری نے جامعہ ملیہ اسلامیہ اور سینٹر فار انوویشن اینڈ انٹرپرینیورشپ کی قیادت اور ہنرمندی کی ترقی کے اقدامات کے توسط سے نوجوانوں کو بااختیار بنانے کی مساعی کی تعریف کی۔ انہوں نے طلبہ کی حوصلہ افزائی کی کہ وہ قوم کی تعمیر اور کمیونٹی کی ترقی میں مؤثر کردار ادا کرنے کے لیے اپنی بات چیت، قیادت اور کاروباری صلاحیتوں کو مسلسل بڑھائیں۔ انہوں نے اس موقع پر پراعتماد، ہنر مند اور خود انحصار نوجوان پیدا کرنے کے لیے پی ایم وکاس کے تحت صلاحیت سازی کے پروگراموں کی اہمیت بھی اجاگر کی۔اقلیتی امور کی وزارت کے وفد نے پروفیسر مظہر آصف،شیخ الجامعہ، جامعہ ملیہ اسلامیہ اور پروفیسر محمد مہتاب عالم رضوی،جامعہ ملیہ اسلامیہ سے بھی ملاقات کی اور جدت، انٹرپرینیورشپ، اور ہنر پر مبنی تعلیم کے لیے یونیورسٹی کے اقدامات کی ستائش کی۔
