وادی کشمیر پھر ہلکی بارش، موسم میں بہتری

سرینگر، موادی کشمیر میں بدھ کی صبح ایک مرتبہ پھر ہلکی بارشوں کے بعد اگرچہ بعددوپہر موسمی صورتحال میں بہتری آئی اور ہلکی دھوپ نکل آئی تاہم محکمہ موسمیات نے 8مئی تک موسم سرد رہنے کی پیشگوئی کرتے ہوئے وادی میں موجود سیاحوں کو گرم کپڑے ساتھ رہنے کی تاکید کی ہے ۔ ادھر محکمہ موسمیات کے مطابق مسلسل بارشوں کے باعث کچھ ایک مقامات پر معمول کے درجہ حرارت میں کمی آئی ہے جبکہ 4سے 6مئی تک جزوی طور پر موسم ابر آلو درہنے کے نتیجے میں درجہ حرارت میں مزید کمی ہونے کا امکان ہے ۔تفصیلات کے مطابق وادی کشمیر میں مسلسل خراب موسمی صورتحال کے چلتے بدھ کی صبح ایک مرتبہ پھر ہلکی بارشیں ہوئی ۔ بدھ کی صبح سے شہر سرینگر سمیت وادی کے دیگر علاقوں میں ہلکی بارشیں ریکارڈ کی گئی جس کے باعث سردی کی لہر میں اضافہ درج کیا گیا تاہم بعد دو پہر موسم بہتر ہونے کے ساتھ ہی ہلکی دھوپ بھی نکل آئی ۔ محکمہ موسمیات کے مطابق تازہ بارشوں کے باعث معمول کے درجہ حرارت میں کمی آئی ہے ۔ درجہ حرارت کے بارے میں محکمہ موسمیات نے بتایا کہ سرینگر میں گزشتہ رات 10.6 ڈگری سینٹی گریڈ کے مقابلے میں کم سے کم 10.4 ڈگری سیلشس درج کیا گیا جبکہ اسی طرح سے قاضی گنڈمیں گزشتہ رات 9.0 ڈگری کے مقابلے میں 8.8 ڈگری کا کم درجہ حرارت ریکارڈ کیا گیا ۔ انہوں نے کہا کہ پہلگام میں گزشتہ رات 6.5 ڈگری سینٹی گریڈ کے مقابلے میں کم سے کم 5.2 ڈگری سینٹی گریڈ ریکارڈ کیا گیا جبکہ شہرہ آفاق گلمرگ میں گزشتہ رات 8.3 ڈگری سینٹی گریڈ کے مقابلے میں کم سے کم 3.5 ڈگری سینٹی گریڈ ریکارڈ کیا گیا۔ حکام نے بتایا کہ کوکرناگ میں گزشتہ رات 8.3 ڈگری کے مقابلے میں 7.4 ڈگری کا کم درجہ حرارت ریکارڈ کیا گیا ۔ انہوں نے کہا کہ کپواڑہ قصبے میں پارہ گزشتہ رات 8.1 ڈگری سینٹی گریڈ کے مقابلے میں 8.7 ڈگری سینٹی گریڈ رہا جبکہ جموں میں کم سے کم درجہ حرارت 18.8 ڈگری سینٹی گریڈ ریکارڈ کیا گیا ۔ ادھر آئندہ 24گھنٹوں میں محکمہ موسمیات نے وقفے وقفے سے ہلکی سے درمیانی بارش کی پیشگوئی کی ہے جبکہ بدھ کے روز کئی مقامات پر درجہ حرارت معمول سے کم ریکارڈ کیا گیا ہے۔محکمہ موسمیات نے بتایا کہ 4سے 6مئی تک موسم جزوی طور پر ابر آلود رہنے کا امکان ہے جبکہ بعد دوپہر گرج چمک کے ساتھ ہلکی بارشیں بھی متوقع ہے ۔ اسی طرح سے انہوں نے کہا کہ 7اور 8مئی کو کچھ ایک مقامات پر بارشیں ہونے کا بھی امکان ہے ۔ انہوں نے سیاحوں سے تاکید کی ہے کہ سرد موسم رہنے کے پیش نظر وہ اپنے ساتھ گرم کپڑے رکھیں ۔