تل ابیب (ہ س )۔ایران اور اسرائیل کے درمیان کشیدگی مزید بڑھتی جا رہی ہے ۔دونوں جانب سے حملوں کا سلسلہ جاری ہے ۔ دریں اثنا ایران کی جانب سے آج اسرائیل میں متعدد مقامات کو نشانہ بنایا گیا جس کے بعد تباہی کا منظر سامنے آیا ہے ۔ اب اسرائیل کی جانب سے ایک بار پھر ایران کو کھلی دھمکی دی گئی ہے ۔اسرائیل کے وزیر دفاع اسرائیل کاٹز نے کہا ہے کہ آج کے حملے کا خامنہ ای سے بدلہ لیں گے۔اسرائیلی وزیر دفاع نے اپنے بیان میں کہا کہ خامنہ ای بنکر میں بیٹھ کر عوام پر حملے کروا رہے ہیں۔ آیت اللّٰہ خامنہ ای کی حکومت کو تہس نہس کردیں گے۔ انہوں نے مزید کہا کہ تہران میں موجود خطرے کو ختم کرنے کے لیے حملوں میں شدت کی ہدایت کی ہے۔واضح رہے کہ ایران نے آج اسرائیل پر اب تک کا سب سے بڑا حملہ کیا ہے جس میں اسرائیلی میڈیا نے بڑی تباہی کا اعتراف کیا ہے۔غیرملکی میڈیا کے مطابق ایرانی میزائل حملوں میں متعدد افراد زخمی ہوئے ہیں۔دریں اثنا تل ابیب اور حیفا پر میزائل حملوں کے بعد، اسرائیلی وزیرِ اعظم بنیامین نیتن یاہو نے ایران کو نئی دھمکیاں دی ہیں۔آج جمعرات کو ایکس پلیٹ فارم پر اپنے ایک پیغام میں انھوں نے کہا کہ "ایران میں دہشت گرد آمر آج صبح بئر سبع میں سوروکا اسپتال” اور وسطی اسرائیل میں عام شہریوں پر میزائل داغ رہے ہیں۔
