منہاج احمد
نئی دہلی ،سماج نیوز سروس:عام آدمی پارٹی (آپ) کو لوک سبھا انتخابات سے پہلے بڑا جھٹکا لگا ہے۔ آپ‘ لیڈر بلبیر سنگھ جاکھڑ پارٹی بدل کر بی جے پی میں شامل ہو گئے ہیں۔ انہوں نے 2019 کے لوک سبھا انتخابات میں مغربی دہلی لوک سبھا سیٹ سے ’آپ‘ امیدوار کے طور پر مقابلہ کیاتھا۔ بلبیر جاکھڑ دہلی میں ایک سینئر وکیل ہیں۔ وہ دہلی کی تمام ڈسٹرکٹ کورٹ بار ایسوسی ایشنز کی رابطہ کمیٹی کے سابق چیئرمین بھی رہ چکے ہیں۔’آپ‘نے 2014 اور 2019 کے لوک سبھا انتخابات میں دہلی کی تمام سات سیٹوں پر امیدوار کھڑے کرکے بی جے پی اور کانگریس کو چیلنج کیا تھا۔ دونوں انتخابات میں ’آپ‘ کا ایک بھی امیدوار جیت نہیں پایا تھا۔ گزشتہ دو لوک سبھا انتخابات میں بی جے پی نے تمام سات سیٹوں پر کامیابی حاصل کی تھی۔ اس بار ’آپ‘نے اپوزیشن اتحاد انڈیاالائنس کے تحت کانگریس سے ہاتھ ملایا ہے۔ ’آپ‘ 4 سیٹوں نئی دہلی، جنوبی دہلی، مشرقی دہلی، مغربی دہلی اور کانگریس 3 سیٹوں چاندنی چوک، شمال مشرقی دہلی اور شمال مغربی دہلی پر انتخاب لڑے گی۔آپ کو بتاتے چلیں کہ لوک سبھا انتخابات قریب ہیں۔ تمام جماعتیں الیکشن کی تیاریوں میں مصروف ہیں۔ ساتھ ہی انحراف کا عمل بھی جاری ہے۔ دوسری پارٹیوں کے رہنما مسلسل بی جے پی میں شامل ہو رہے ہیں۔ بی جے پی زیرقیادت این ڈی اے کو یقین ہے کہ وہ اس بار 400 سیٹوں کے ساتھ جیت کی ہیٹ ٹرک بنائے گی۔ اس کے ساتھ ہی اپوزیشن الائنس انڈیا ٹوٹ پھوٹ کے بعد دوبارہ متحد ہونے کی کوشش کر رہا ہے۔ ملک میں لوک سبھا کی کل 543 سیٹوں پر انتخابات ہوں گے۔
