دیوبند، سماج نیوزسروس: دیوبند تحصیل علاقہ کے گاؤں نونابڑی میں واقع مدرسہ جامعہ دارالعلوم حسینیہ میں سالانہ جلسہ کا انعقاد کیا گیا۔ جس میں علمائے کرام نے طلباء کو محنت اور لگن کے ساتھ تعلیم حاصل کرنے کی تلقین کی۔ اس دوران علماء کے ہاتھوں بچوں کی دستار بندی بھی کی گئی۔مدرسہ احاطہ میں منعقدہ پروگرام میں مولانا قاری توقیر عالم نے کہا کہ اسلامی تعلیم انسان کو صحیح راستے پر چلنے کا درس دیتی ہے اور دوسروں کی مدد کا جذبہ پیدا کرتی ہے۔ اس لیے طلبہ کو پوری محنت اور لگن کے ساتھ تعلیم حاصل کرنی چاہیے۔انہوںنے بچوں کو علم کی اہمیت سے روشناس کرایا،ساتھ لوگوں کو مدارس و مکاتب کی ضرورت اور اہمیت سمجھائی۔ ادارہ کے مہتمم مولانا محمد انعام نے کہا کہ مدارس دین کے مضبوط قلعے ہیں۔ یہاں سے تعلیم حاصل کرنے والے طلبہ دنیا کے کونے کونے میں علم کی روشنی پھیلا رہے ہیں۔ انہوں نے بچوں کو قیمتی نصیحتوں سے نوازا اور مدرسہ کی کارکردگی پیش کی۔اس دوران قاری معروف نے اشعار کے ذریعہ سیرت النبیؐ اور تعلیم کی عظمت پر روشنی ڈالی۔پروگرام میں علماء نے تعلیم مکمل کرنے والے طلبہ کی دستار بندی کی اور ان کے روشن مستقبل کے لیے دعا ء کی۔ اس دوران گاؤں کے پردھان محمد شعیب، مولانا ارشاد، ماسٹرآس محمد، مولانا سعود، مولانا صادق، ماسٹرآباد سمیت جملہ طلبہ و اساتذہ اور گاؤں کے لوگ موجودرہے۔
