نئی دہلی ، سماج نیوز سروس: تاریخی دھر بھوج شالا معاملے میں اندور ہائی کورٹ کے فیصلے کا اثر متھرا میں بھی پڑ رہا ہےاور ہندو فریق کی امیدیں بڑھ رہی ہیں۔موصولہ تفصیلات کے مطابق اندور میں تاریخی بھوج شالا کے بارے میں اندور ہائی کورٹ کے حالیہ فیصلے نے اتر پردیش میں متھرا اور کاشی کے درمیان تنازعات میں نئی جان ڈال دی ہے۔ اے ایس آئی کی رپورٹ اور شواہد پر مبنی اندور ہائی کورٹ کے فیصلے کا بڑے پیمانے پر خیر مقدم کیا گیا ہے۔ نتیجتاً، متھرا میں ہندو جماعتوں نے اب شری کرشن جنم بھومی کو تجاوزات سے آزاد کروانے کا مطالبہ تیز کر دیا ہے۔سری کرشنا جنم بھومی کیس کے درخواست گزار دنیش شرما پھلہاری نے کہاہے کہ وہ الہ آباد ہائی کورٹ سے بھوج شالا پر اندور ہائی کورٹ کے حکم کا حوالہ دیتے ہوئے شری کرشن جنم بھومی کو تجاوزات سے آزاد کروانے کا مطالبہ کریں گے۔شری کرشنا جنم بھومی شاہی عیدگاہ مسجد تنازعہ کیس میں درخواست گزار دنیش شرما پھلہاری نے اندور ہائی کورٹ کے فیصلے کو تاریخی قرار دیا ہے۔ انہوں نے کہا کہ جس طرح عدالت نے بھوج شالا معاملے میں ثبوت اور اے ایس آئی کی رپورٹ کو ترجیح دی، اسی طرح کی امیدیں اب متھرا اور کاشی کے معاملے میں بھی پیدا ہوئی ہیں۔دنیش شرما نے کہا کہ معزز عدالت نے تمام فریقین کو سننے اور اے ایس آئی رپورٹ کا جائزہ لینے کے بعد ہندو فریق کے حق میں فیصلہ سنایا ہے۔ مغل حکمرانوں نے تلوار کی نوک پر ہمارے قدیم مذہبی مقامات پر ناجائز قبضہ کیا۔
